Zamanaýı álemdegi naryqta múmkindigi shekteýli adamdardyń ómirin edáýir jeńildetip, olardyń avtonomııasyn keńeıtetin kóptegen quraldar jeterlik. Jasandy ıntellektke negizdelgen tehnologııalar bizdiń kúndelikti ómirimizde keńinen qoldanylady. Jasandy ıntellekt tipti qaterli isik aýrýyn dıagnostıkalaý jáne múgedekter úshin ınklıýzıvti orta qurý sııaqty mamandandyrylǵan salalarda keńinen qoldanylady.
IýNESKO málimetteri boıynsha, ashtyq pen klımattyń ózgerýi sııaqty problemalarmen kúresýde jasandy ıntellektti qoldaný - ýaqyt talaby. Dese de, IýNESKO bul tehnologııalar «buryn-sońdy bolmaǵan problemalardy» týdyrýy múmkin dep eskertedi.
«Biz genderlik jáne etnıkalyq turǵydan teris uǵym kórinisterin, sondaı-aq jeke ómir men bostandyqtyń buzylýyn, jappaı baqylaý qaýpin jáne quqyq qorǵaý organdarynyń jasandy ıntellekt tehnologııasyn teris paıdalanýyn baıqap jatyrmyz. Osy ýaqytqa deıin teris paıdalanýdy shekteıtin ádister, biregeı standarttar bolmaǵan», delingen IýNESKO málimdemesinde.
IýNESKO-ǵa múshe elder qabyldaǵan qujat jasandy ıntellekt tehnologııasynyń etıkalyq damýyn qamtamasyz etý úshin quqyqtyq ınfraqurylym qalyptastyrýǵa baǵyttalǵan.
«Álemge belgili bir jasandy ıntellektti qoldaný erejeleri qajet. Biz qabyldaǵan qujat álemde alǵashqy jahandyq normatıvtik baza ornatyp, memleketke ony qoldanǵany úshin jaýapkershilik júkteıdi», dedi IýNESKO bas dırektory Odrı Azýle.
