Qazaqstandyq tennısshi Iаroslava Shvedova Brazılııada ótip jatqan Brasil Tennis Cup týrnıriniń 1/4 fınalyna ótti.
Ol jarysty jaqsy bastap, birinshi aınalymda ıspan tennısshisi Sılvııa Soler-Espınosany eki sette jeńse, odan keıin cheh sportshysy Barbara Zahlavova-Strykovany – 6:2, 7:5 esebimen utty. Endi ol shırek fınalda týrnırdiń altynshy raketkasy rýmyn tennısshisi Aleksandra Kadantýmen kezdesedi.
Osy týrnırde Shvedova juptyq synda da óner kórsetýde. Ol Anabel Medına Garrıgespen birge eki oıyndy jeńip, jartylaı fınalǵa joldama aldy.
Týrnırdiń syıaqy qory – 250 myń AQSh dollary.
JASTAR MYQTYNY ANYQTAIDY
Qyzylordada 1996-1997 jyldary týǵan jastar arasynda bokstan el chempıonaty bastaldy. Oǵan elimizdiń barlyq óńirinen kelgen 200-ge jýyq bylǵary qolǵap sheberi qatysýda. Jekpe-jekter 11 salmaq dárejesi boıynsha ótýde. Bıylǵy jastar arasynda ótip jatqan jarysqa álem, Azııa chempıonatyna qatysqan boksshylar da kúsh synasýda. Olardyń arasynda álem chempıony astanalyq Rahat Myrjyqpaev, Azııa chempıondary qaraǵandylyq Vladıslav Stalbovskıı, qyzylordalyq Sabyrjan Ábilov pen basqa da boksshylar bar. Qazaqstan chempıonaty bir aptaǵa sozylady. «Egemen-aqparat».
