Kelesi qarsylas – Serbııa

Madrıdtegi Qazaqstan – Ka­nada matchyn bizdiń jigitterden Mıhaıl Kýkýshkın bastap berdi. Shvesııamen bolǵan alǵashqy oıynda jeńilip qalǵan ol bul básekede namysqa tyrysyp, Qazaqstan quramasyna alǵashqy jeńisti syılady. Álemdik reıtıngte 234-orynda turǵan kanadalyq Breıden Shnýrmen kezdesken Mıhaıl birinshi partııada breık jasap, 6:3 esebimen jeńiske jetti. Ekinshi sette taı-breıkte Shnýrdyń joly boldy – 7:6 (7:5). Úshinshi, sheshýshi partııada áýeli kanadalyq sportshy breık jasaǵanymen, Kýkýshkın alysqa uzatqan joq. Aqyry match­ty taǵy bir breıkpen támamdady – 7:5. Tartysty ótken báseke úsh saǵatqa jýyq ýaqytqa sozyldy.

Ekinshi kezdesýde Qazaqstan­nyń birinshi raketkasy Aleksandr Býblık Vashek Pospıshılmen sheberlik baıqasty. Birinshi partııada Býblık eki ret breık jasap, 6:2 esebimen bul setti óz paıdasyna aıaqtady. Ekinshi set tartysty ótip, taı-breıkte qazaqstandyq tennısshi qarsylasynyń setbol jasaýyna múmkindik bermedi. Sosyn ózi matchbolyn múlt ji­ber­­gen joq – 7:6 (8:6). Eki sette qar­sylasynan basym túsken A.Býblık esepti 2:0-ge jetkizip, Qazaq­stan quramasyn merziminen buryn jarystyń shırek fınalyna shyǵardy. Osylaısha, jerlesterimiz altynshy márte De­vıs kýbogynyń shırek fınalyna jolda­ma aldy. Buǵan deıin Qazaq­stan bes ret (2011, 2013, 2014, 2015, 2018) osy márege deıin jetken bolatyn.

Eki qurama arasyndaǵy sońǵy, úshinshi match oıyn taǵdyryna aıtar­lyqtaı áser etpeıtin bolsa da, jerlesterimiz bul teke-tires­te qar­sylastaryna aıaýshylyq tanyt­qan joq. Juptyq synda An­dreı Golýbev pen Aleksandr Ne­do­vesov kanadalyq Peter Polans­kı men Breıden Shnýrdy tize búktirdi. Birinshi partııada breık jasaǵan qazaqstandyq jup ba­sym­dylyq kórsetti – 6:4. Ekin­shi sette taı-breıkte kana­dalyqtar sátti oınady – 7:6 (8:6). Úshinshi, sheshýshi pa­rtııada qazaq­stan­dyqtar qar­sylastaryna bet qa­ratpady – 6:1. Osy­laısha, Qazaq­stan quramasy Kanadany 3:0 esebi­men jeńdi.

1 jeltoqsanda ótetin shırek fınalda jerlesterimiz F tobynda ekinshi oryn alǵan Serbııa jigit­teri­men kezdesedi. Serbter óz to­b­yndaǵy alǵashqy oıynda Aýs­­­trııa­­ny 3:0 esebimen jeńse, Ger­­­ma­nııadan 1:2 esebimen jeńilip qaldy.

Serbııa – álemdik reıtıngte 7-orynda turǵan azýly qurama. Olar 2010 jyly Devıs kýbogyn jeńip alǵan bolsa, 2013 jy­ly fınalǵa deıin jetti. Bul qura­manyń qazirgi tańdaǵy eń úzdik oıyn­shysy – Novak Djokovıch. Ol «Úlken dýlyǵa» sanatyndaǵy jarystarda 20 márte top jarǵan.