Bıyl 26 shildede Shymkent qalasyndaǵy áskerı bólimde Túrkistan oblysy Arys qalasyndaǵy áskerı qoımadaǵy jarylysqa qatysty aıyptalǵan 16 adamǵa úkim oqylǵan. Sot 16 adamnyń 12-ine 4-10 jyl aralyǵynda túrme jazasyn berdi, 4-i shartty túrde sottaldy. Shartty jaza merzimi 4 pen 7 jyl aralyǵy.
Apellıasııalyq sot sheshimimen Qanat Aqtanov, Erlan Omarov, Asat Bralın, As-Salladın Sarjanov, Baýyrjan Nııazov, Marat Sarsenov jáne Kópjan Nurmahambetov qylmystyń eskirý merzimine baılanysty qylmystyq jaýapkershilikten bosatylǵan. Bastapqyda olarǵa qyzmetine salǵyrttyq tanytty degen aıyp taǵylǵan.
Sonymen birge Qýanysh Ospanov, Rýslan Omarov, Iýrıı Karakalchev, Meırambek Júsipov pen Azamat Aıapbergenov qamaýdan bosatylǵan.
2019 jyldyń 24 maýsymynda Arystaǵy áskerı oq-dári qoımasy jarylyp, sonyń saldarynan tórt adam qazaǵa ushyrady. Olardyń ekeýi – áskerı, bireýi – beıbit turǵyn, al bir bala evakýasııalaý kezinde jol apatynan mert boldy. Oqıǵa saldarynan alpys myńnan astam adam úı-jaıyn tastap ketýge májbúr boldy. Resmı málimet boıynsha, qaladaǵy 7 527 úı men kópqabatty 103 turǵyn úı zaqymdanǵan. Paıdalanýǵa jaramsyz bolyp qalǵan 420 úı men 3 kópqabatty turǵyn úı qulatylǵan.
