Táýelsizdik lentasynyń tusaýy 2020 jyldyń 12 jeltoqsanynda Qaraǵandy qalasynda kesilgen bolatyn. Bıyl uıymdastyrýshylar atalǵan is-sharany el Táýelsizdiginiń 30 jyldyǵyna jáne birqatar tarıhı dataǵa arnady. Olardyń qatarynda Ekinshi Shyǵys Túrki qaǵanatynyń negizin salýshylardyń biri, úsh birdeı qaǵannyń keńesshisi bolǵan Tonykóktiń týǵanyna – 1375 jyl, Shyǵys Túrki qaǵanatynyń bıleýshisi Bilge qaǵannyń týǵanyna – 1340 jyl, Qasym Jánibekulynyń han atanǵanyna – 510 jyl, Abylaı hannyń týǵanyna – 310 jyl, Qazaq handyǵynyń qalypqa keltirilgenine – 180 jyl, Álıhan Bókeıhannyń týǵanyna – 155 jyl, Álimhan Ermektiń týǵanyna – 130 jyl jáne basqa da tarıhı tulǵalardyń mereıtoılary bar.
«Táýelsizdik taspasy» aksııasyn uıymdastyrýshylardyń biri Nurjan Surshauly bul is-sharanyń Qaraǵandy oblysyn jáne Nur-Sultan qalasyn qamtıtynyn aıtady.
– Aksııa barysynda jastarmen kezdesip, Táýelsizdik taspasynda kórinis tapqan tarıhı tulǵalar jaıly aıtyp berýdi jáne taspalardy taratýdy maqsat etip otyrmyz. Is-sharada barlyǵy myńnan asa taspa taratylatyn bolady, –deıdi ol.
Táýelsizdik taspasynda qazaq tarıhyna esimderi altyn árippen jazylǵan jeti tarıhı tulǵa men tórt tarıhı data, Qazaqstan Respýblıkasynyń jer aýmaǵyn beıneleıtin karta men Túrki qaǵanatynyń Bórili baıraǵy kórinis tapqan. Lentanyń astyńǵy jaǵynda birinshi bolyp Qazaqstan Respýblıkasynyń qazirgi jer aýmaǵyn beıneleıtin karta, odan keıin osy aýmaqta meken etken saqtardyń Esik qorǵanynan tabylǵan Altyn adam beınelengen.
Uıymdastyrýshylar el azamattary Táýelsizdik taspasyn Qazaqstan Respýblıkasynyń memlekettik merekelerinde, saltanatty sharalarda taǵyp júrse degen tilek aıtady.
– Táýelsizdik taspasyn taǵyp júrý árbir azamat úshin úlken jaýapkershilik jáne onyń ıegeri lentada beınelengen uly tulǵalardyń jolyn jalǵastyrýǵa, saqtaýǵa, ony jas urpaqqa nasıhattaýǵa múmkindigi kelgenshe atsalyssa, nur ústine nur bolar edi, – deıdi N.Surshauly.
Al taspany keýdege taǵýdyń tártibi Youtube arnasyndaǵy «Táýelsizdik lentasyn qalaı taǵamyz?» atty rolıkte kórsetilgen eken.
Qaraǵandy oblysy
