Kógershin ósirýdi hobbıi sanaıtynnyń biri – Talap Jarylǵasynov. Qursaı eldi mekeninde turatyn 56 jastaǵy azamat kógershin ósirýdi oqýshy kezinde bastaǵan.
– Áli kúnge deıin kógershindi jan raqaty úshin ósiremin. Biraq budan eshqandaı paıda kórmeımin. Qazir meniń 50-den astam kógershinim bar. Balalarymnyń kógershin asyraýmen aınalysqanyn qalaımyn. Kórmege nemis, cheh kógershinderin ákeldim. Meniń kógershinderim 2019 jyly osyndaı kórmede birinshi oryn alǵan edi, – deıdi Talap Jarylǵasynov.
Atyraýlyqtar kórmege ákelingen túrli tústi kógershindermen sýretke túsýge múmkindik aldy. Bıyl altynshy músheline tolǵan Alekseı Handokın kógershin ósirýshiler áýletinen shyqqan. О́zi de kógershin ósiredi. Kógershinderin serýenge shyǵaryp, áýede bılegenin qyzyqtaǵandy táýir kóredi. Kórmege ózgelerdiń kógershinin kórý úshin kelipti.
Al oblystyq kógershin ósirýshiler federasııasynyń prezıdenti Jánibek Qalekenovtiń ózi 60-qa jýyq kógershin asyraıdy eken. Bul kórmege 150-den astam adam ózderi asyraıtyn kógershinderdiń túr-túrin ákelipti.
– Biz Qazaqstan men Reseıdiń kógershin asyraýshylary úshin kórme ótetinin habarlaǵan edik. Bul kórmege Aqtóbe men Qyzylorda oblysynyń Qazaly aýdanynan kógershin ósirýshiler qatysyp otyr. Biraq reseılikter qatysa almady. Oǵan Reseıdegi koronavırýs ınfeksııasynyń órshýi áser etip otyr. Endi aldaǵy naýryz aıynda taǵy da kórme ótkizemiz dep úmittenemiz. О́ıtkeni Atyraýda kógershin ósirýshiler sany artyp keledi. Demek bizdiń izbasarlarymyz bar, – dep kúledi Jánibek Qalekenov.
Kórmeniń sońynda sporttyq kógershinder jarysy ótti. Onyń qorytyndysynda kógershin ósirýshiler estelik syılyqtarmen marapattaldy.
Atyraý oblysy
