Prezıdenttiń Qazaqstan halqyna Joldaýyn iske asyrý aıasynda bekitilgen «Ańsaǵan sábı» baǵdarlamasy boıynsha 2021 jyly Nur-Sultan qalasyna 487 kvota bólindi. Bul ótken jylmen salystyrǵanda 7 ese kóp. Osynyń arqasynda uzaq ýaqyt nekede turyp, bala ańsap júrgen kóptegen elordalyq MÁMS aıasynda EKU baǵdarlamasynan ótý múmkindigine ıe boldy.
«Ańsaǵan sábı» baǵdarlamasy týraly estigende kúıeýim ekeýmiz baǵymyzdy synap, qatysý týraly sheshim qabyldadyq. Aldymen óz emhanamyzǵa baryp, qajetti qujattardy tapsyrdyq. Bala – ómirdiń máni. О́kinishke qaraı, uzaq ýaqyttan beri bala súıe almaı júrdik», deıdi baqytty ana.
Pasıent emhanadan №2 kópbeıindi qalalyq aýrýhananyń áıelder densaýlyǵy bólimshesine jiberiledi. Tekserýden keıin, júrgizilgen konservatıvtik terapııanyń áseriniń joqtyǵyn eskere otyryp, erli-zaıyptylar dárigerlik konsılıýmnyń sheshimi boıynsha MÁMS aıasynda EKU rásimin júrgizý úshin kezekke qosyldy.
«Jeltoqsan aıynda, Densaýlyq saqtaý basqarmasy jumys komıssııasynyń maquldaýyn alyp, №272 buıryqtyń krıterıılerine sáıkestigin eskerip, MÁMS sheńberinde EKU ótý úshin kvota aldy. Pasıent EKU jasaý úshin Almaty qalasyndaǵy Reprodýktıvti medısına ınstıtýtyn tańdap, 12 aptaǵa deıin der kezinde esepke turdy, ary qaraı aýrýhanamyzdaǵy dárigerlerdiń barlyq usynymyn durys oryndady, ustandy», deıdi akýsher-gınekolog Alýa Mansurova.
Barlyq pregravıdarlyq kezeń jáne EKU rásimi aldyndaǵy daıyndyq, júktilikti baqylaý jáne bosaný Nur-Sultan qalasyndaǵy №2 kópbeıindi aýrýhanada ótti.
Búginde Ámirhan atty sábıdiń anasy «Ańsaǵan sábı» baǵdarlamasy ata-ana baqytyn syılaǵanyn aıryqsha atap ótti.
«Bul baǵdarlama biz sekildi balaly bolǵysy keletin erli-zaıyptylar úshin úlken múmkindik. Buryn biz aqyly negizde EKU jasadyq, biraq bári sátsiz aıaqtalǵan. Bul joly da úmitimiz oryndalmaıdy dep qatty alańdap edik, baqytymyzǵa qaraı ata-ana atanyp otyrmyz. Júktilikke deıin jáne júktilik kezinde basy-qasymyzda bolǵan dárigerlerge alǵysym sheksiz. Aýrýhananyń barlyq medısına qyzmetkerlerine raqmet aıtqym keledi. Biz baqyttymyz!» dep qýanyshymen bólisti jas ana.
