Endeshe Elbasynyń «Táýelsizdik taǵylymy» atty maqalasy arqyly egemen eldiń júrip ótken jolyn saralaýy, ony óskeleń urpaqqa ósıet retinde jetkizýi mańyzdy másele deýge bolady. Sondyqtan Elbasynyń ótken kezeńdegi oqıǵalardy oıǵa alyp, Táýelsizdiktiń qandaı qıyndyqpen jarııalanǵany, sol jyldardaǵy Parlamenttegi aıtys-tartys týraly aıtyp otyrǵanynda úlken mán bar.
«Arǵyda saq, ǵun babalarymyz, beride qaharman túrik atalarymyz alasapyran zamandardaǵy alaquıyn daýyldarǵa tótep berip, Uly dalada ulyq ulys qurdy. Talaı jurt alapat soǵystar men arpalysqan aıqastarda údere kóship, bordaı tozyp, tastaı úgilip, qumdaı shaıylyp ketken zamandarda qazaqtar túrik jurtynyń ata qonysyn, qara shańyraǵyn saqtap qaldy», deıdi Tuńǵysh Prezıdent – Elbasy Nursultan Nazarbaev.
Rasymen de, ultymyz Uly dala tósinde ulyq ulys qura otyryp, baıyrǵy qonysyn da, salt-dástúri men mádenıetin de, tilin de, qaısar rýhyn da saqtap qaldy. Zamana daýyly dıirmenniń tasyndaı shyr aınalǵan tusta da halqymyzdyń untaqtalyp úgilip, qıyndyqtan beli búgilip ketken joq. Solaı bola turǵanymen, egemendik elimizge aspannan salbyrap túse salmaǵany da anyq. Bul jóninde Elbasynyń maqalasynda da jan-jaqty baıandalǵan. Eń bastysy, Táýelsizdik halqymyzdyń ǵasyrlar boıǵy ańsaǵan armany, ulttyń uly muraty, ekiniń biriniń baǵyna buıyra bermeıtin baǵa jetpes baılyǵy. Al oǵan dáýirler boıy jalǵasyp kele jatqan tarıhı dástúr men qazaq halqynyń azattyqqa degen qulshynysynyń, talpynysynyń, otandastarymyzdyń jyldar boıy úrdisi úzilmegen qaısar kúresiniń nátıjesinde qol jetkizdik. Egemendik – sol ulttyq umtylystardyń zańdy qorytyndysy.
Aıdos SARYM,
Parlament Májilisiniń depýtaty
