Birikken Ulttar Uıymynyń OCHA gýmanıtarlyq agenttiginiń habarlaýynsha, muqtaj 183 mıllıon adamǵa kómektesý úshin rekordtyq deńgeıde 41 mıllıard dollar qajet. Bul soma bıylǵy ketken qarajattan kóp.
OCHA basshysy Martın Grıffıts beısenbide ótken baspasóz máslıhatynda muqtaj adamdardyń sany sonshalyqty kóp bolmaǵanyn aıtyp otyr. «Klımattyq daǵdarys álemdegi eń osal topqa kiretin adamdarǵa tikeleı áser etip otyr. Uzaq ýaqytqa sozylǵan qaqtyǵystar jalǵasyp jatyr, álemniń birneshe bóliginde, atap aıtqanda, Efıopııa, Mıanma jáne Aýǵanstanda ahýal nasharlady», dedi M.Grıffıts.
OCHA jahandyq gýmanıtarlyq sholý esebinde kelesi jyly álem boıynsha 274 mıllıon adam shuǵyl kómekke muqtaj bolatynyn eskertti. Bul 2021 jylǵy kórsetkishten 17 paıyzǵa joǵary.
Qujatta 2022 jyly árbir 29 adamnyń bireýi kómekke zárý bolatyny aıtylǵan. Osylaısha, 2015 jyldan beri bul kórsetkish 250 paıyzǵa ósken. Ol kezde ár 95 adamnyń bireýi kómekke zar edi.
Bıyl donorlar 17 mıllıard dollardan astam qarjy bóldi. Bul BUU suraǵan somanyń jartysyna da jetpeıdi. «Qansha talpynsaq ta, 41 mıllıard dollar berilmeıtinin bilemiz», deıdi M.Grıffıts.
BUU-nyń gýmanıtarlyq uıymynyń basshysy osy qurylymnyń Azyq-túlik jáne aýyl sharýashylyǵy uıymynyń esepterin keltirdi. Qujatta birqatar eldi mekende 45 mıllıon adam asharshylyq aldynda turǵany aıtylǵan.
BUU qazirge deıin Ońtústik Sýdandaǵy jarty mıllıon adamǵa áser etken ashtyqty toqtatty. Sondaı-aq Iemendegi 10 mıllıon adamǵa medısınalyq kómek kórsetti.
Aýǵanstan, Sırııa, Iemen, Efıopııa jáne Sýdandaǵy daǵdarys eń kóp qarjylandyrýdy qajet etedi. Ásirese, Aýǵanstandaǵy 24 mıllıonnan astam adam ómirin saqtap qalý úshin kómekke muqtaj.
