О́tken aptada Táýelsizdiktiń 30 jyldyǵyna arnalǵan «Dala dıdary» óner festıvalinde Ulan jáne Glýbokoe aýdandarynyń kórmesi ashyldy. Ár aýdannyń óneri ózinshe erekshe. Biri ozyp, biri kem túsip jatyr deýden aýlaqpyz. Baıqaý bolǵan soń ony arnaıy qurylǵan ádilqazy músheleri jyl sońyna qaraı anyqtaıdy.
Bul jolǵy festıvalda ádettegideı aýdan týraly beınebaıan usynyldy, ánshiler áýelete án shyrqady. Sahnaǵa Ulan aýdanynyń «Beskól», Glýbokoe aýdanynyń «Saryn» folklorlyq ansamblderi shyǵyp, óner kórsetti. Jeke daýystaǵy ánshileri de quıqyljyta án shyrqap, kúmbirlete kúı tókti.
Sharanyń ekinshi bóliminde vernısaj qonaqtary mýzeıdiń úlken jáne baǵanaly zaldaryndaǵy eki aýdannyń kórmesin tamashalady. Kórermender kórmeni tamashalap qana qoıǵan joq, Amangeldi Smaǵulov, Nurjan Eshojın syndy qolóner sheberleriniń dombyra, astaý jasaý sátterin kórdi, qyzyqtyrǵan suraqtaryn qoıdy. Kópshiliktiń nazary júnnen túskıiz basyp, gobelen, ıaǵnı kilem-sýret toqyp otyrǵan Gaýhar Qalıevanyń shákirtterine aýdy. Ulan aýdany Mamaı batyr aýylynan kelgen Ásem Arynqul qurǵaq júnnen túskıizdi jańasha túrlendirse, Ińkár Baýyrjanqyzy kergishte keste toqyp, tańdaı qaqtyrdy eldi. Al Mamaı batyr aýylynyń oqýshysy Álıhan Ádilhanov ózine komıks janry unaıtynyn aıtty. Aıta ketsek, elimizde komıkspen aınalysatyn sýretshiler ileýde bireý. Jas ta bolsa, kúrdeli janrdy qolǵa alǵan Á.Ádilhanovtyń jumysyna kásibı sýretshiler oń baǵasyn berip jatty.
Shyǵys Qazaqstan oblysy
