Áleýmettik qamsyzdandyrý salasyndaǵy reformalardy iske asyrý jóninde Premer-Mınıstrdiń orynbasary Eraly Toǵjanov baıandama jasady. Ol áleýmettik kodekstiń ázirlenýi, zeınetaqy júıesiniń jańǵyrtylýy týraly aıtty.
Atalǵan másele boıynsha Prezıdenttiń ekonomıkalyq damý máseleleri jónindegi shtattan tys keńesshisi Ser Sýma Chakrabartı de óz pikirin bildirdi.
Baıandamany jáne qatysýshylardyń pikirlerin tyńdaǵan Memleket basshysy pandemııa áleýmettik-ekonomıkalyq damýdyń problemalaryn ashyp kórsetkenin jáne olardyń shıelenise túskenin atap ótti.
Prezıdent halyq tabysynyń ósý qarqyny baıaýlap, áleýmettik teńsizdik máselesiniń ýshyǵýy basty túıtkilderdiń biri dep sanaıdy. Onyń aıtýynsha, búkil álemdegideı Qazaqstanda da bıznes pen halyqqa qoldaý kórsetý úshin daǵdarysqa qarsy ártúrli shuǵyl bastamalar men sharalar júzege asyryldy. Bul táýekel-qaterlerdi azaıtýǵa jáne elimizdiń ekonomıkalyq ahýalyn turaqtandyrýǵa múmkindik berdi.
«Úkimet tıisti sharalardy qabyldady dep sanaımyn. Pandemııadan sabaq alyp, áleýmettik saıasatymyzdy jańa jaǵdaılarǵa júıeli túrde beıimdeýimiz kerek. Jalpy, usynylyp otyrǵan maqsattar men mindetterdi qoldaı otyryp, ázirlenip jatqan Áleýmettik kodekstiń jańa «qoǵamdyq sharttyń» negizgi bóligine aınalýy qajet ekenin aıtqym keledi. Kodeks boıynsha memleket jańartylǵan áleýmettik mindettemelerdiń oryndalýyna kepildik beredi. Alaıda, barlyq qazaqstandyq bolashaǵyn oılap, ózderine jaýapkershilik pen mindettemeler ala bastaýy kerek. Áleýmettik jańǵyrýdyń barlyq quraly naqty jumys istep, azamattar men bıznes úshin túsinikti bolýǵa tıis», dedi Prezıdent.
Jıyn barysynda Prezıdenttiń ekonomıkalyq damý máseleleri jónindegi shtattan tys keńesshisi Ser Sýma Chakrabartı men Qarjy naryǵyn retteý jáne damytý agenttiginiń tóraǵasy Madına Ábilqasymova bank sektorynyń damýy jáne qundy qaǵazdar naryǵy týraly tıimdi makroekonomıkalyq saıasat boıynsha Konsýltatıvtik komıtettiń esebin usyndy.
Ulttyq qor men Biryńǵaı jınaqtaýshy zeınetaqy qoryn basqarý strategııasynyń tıimdiligin arttyrý jóninde Ulttyq bank tóraǵasy Erbolat Dosaev baıandama jasady. Aktıvterdi basqarý strategııasyn odan ári jetildirý úshin jańa strategııalyq allokasııaǵa kóshý, ınvestısııalyq úderiske ESG faktorlaryn engizý, aksııalardyń portfelderin hedjerleý (naryqtyq táýekel-qaterlerden saqtandyrý), sondaı-aq aktıvterdi basqarý úderisteriniń sıfrlandyrylýyn qamtamasyz etý sharalary usynyldy.
Ulttyq banktiń boljamyna sáıkes kepildendirilgen transfertterdiń azaıýyna baılanysty 2022-2030 jyldar aralyǵynda Ulttyq qorǵa túsetin qarjy kólemi 20 mıllıard dollardy quraıdy. Nátıjesinde Ulttyq qordyń aktıvteri 2030 jylǵa qaraı 100 mıllıard dollarǵa jetedi. Onyń keminde 50 paıyzy ınvestısııalyq tabystan túsedi.
Bıyl Reformalar jónindegi joǵary keńes el damýynyń barlyq baǵytyn qamtıtyn 20-dan asa máseleni qarastyrdy.
Jıyn sońynda keńes músheleri aldaǵy 2022 jylǵa arnalǵan jumys josparyn bekitti.
