Elordalyq hokkeıshiler birer kún buryn Nıjnekamskide «Neftehımıkti» 4:2 esebimen jeńip, eki matchqa sozylǵan jeńilisine núkte qoıǵan edi. Bul oıynda da jerlesterimizdiń mereıi ústem boldy.
«Tatneft Arena» sport keshenine jınalǵan jankúıerler básekeniń birinshi kezeńinde gol kóre almady. Alǵashqy 20-mınýtta aıdyn ıeleri basymdyq tanytqanymen, Ortıo qorǵaǵan qaqpadan sańylaý taba almady. Úzilisten keıin match tizginin «Barys» oıynshylary óz qoldaryna aldy. Oıynnyń 21-mınýtynda Iаkob Lılıa Egor Shalapovtyń nátıjeli pasynan keıin qaqpashy Tımýr Bılıalovtan aılasyn asyryp, kezdesýdiń esebin ashsa, úshinshi kezeńniń orta tusynda Arkadıı Shestakov elordalyq komandanyń basymdyǵyn nyǵaıta tústi – 2:0. Kezdesýdiń 58-mınýtynda «Ak Bars» sapynan Dmıtrıı Voronkov esep aıyrmasyn qysqartqanymen, komandasyn jeńiske jeteleı almady. Osylaısha, Iýrıı Mıhaılıs shákirtteri Tatarstandaǵy eki oıyndy da jeńispen túıindedi.
