Departament taratqan resmı málimdemede marqumnyń kólik urlyǵyna qatysty ustalǵany jáne tergeýge alynǵany aıtylǵan. Odan jaýap alý kezinde er adam ózin nashar sezinip, artynsha esin joǵaltyp alypty. «Dereý jedel járdem shaqyryldy, alaıda, dárigerler kelgenshe ol qaıtys bolyp ketti. О́limniń naqty neden bolǵany anyqtalyp jatyr», dedi polıseıler.
Al, marqumnyń týystary bolsa polıseıler tarapynan qysym bolǵanyna senimdi.
Qaıtys bolǵan jigit – Qostanaı qalasynyń turǵyny Nurbolat Jumabaev, 1990 jyly týǵan. Ol buǵan deıin urlyq úshin sottalyp, jazasyn ótegen eken. Bir jyl buryn túrmeden shyǵyp, úılenýge sheshim qabyldaǵan. Súıiktisi Shymkentte turǵandyqtan, jýyrda osy qalaǵa kelipti.
«7 jeltoqsanda onymen telefon arqyly sóılestim. Jaǵdaıy jaqsy ekenin aıtty. Al, 8 jeltoqsanda maǵan Shymkenttegi dostarym habarlasyp, Nurbolat pen janyndaǵy serigin polısııa ustap áketkenin habarlady. Artynsha, polısııadan habarlasyp, máıitti alyp ketińder dedi. Dostarym dereý advokat jaldady, ol Polısııa departamentine baryp, Nurbolattyń denesinde soqqy izderi baryn habarlady. Qazir Shymkentke ózim bara jatyrmyn, baýyrymnyń denesin óz kózimmen kórýim kerek. Ol buǵan deıin eshqashan júrek aýrýyna shaǵymdanǵan emes, shańǵy sportymen aınalysqan. Densaýlyǵy jaqsy edi. Polıseıler aıtqandaı, júrek aýrýynan qaıtys bolýy múmkin emes», deıdi marqumnyń baýyry Janbolat.
Atalǵan ispen qazir Shymkent qalalyq Polısııa departamenti О́zindik qaýipsizdik basqarmasynyń mamandary aınalysyp jatyr.
