«Jeltoqsannyń 9-y kúni birqatar buqaralyq aqparat quraldarynda Shymkent qalasynyń jáne Túrkistan oblysynyń janarmaı quıý beketterinde benzın tapshylyǵy týyndaǵany týraly aqparat tarady. Osyǵan oraı «QazMunaıGaz» UK AQ qazirgi ýaqytta barlyq úsh qazaqstandyq munaı óńdeý zaýyty qalypty jaǵdaıda jumys istep turǵanyn málimdedi. Munaı óńdeý jáne munaı ónimderin shyǵarý QR Energetıka mınıstrligi bekitken jospardan tys oryndalyp jatyr», dedi kompanııa ókili.
Shymkent munaı óńdeý zaýyty táýligine shamamen 6 myń tonna benzın óndirip shyǵarady. Zaýyttan benzın munaı berýshilerdiń ótinimderine sáıkes ýaqtyly jiberilýde jáne táýligine 6 myńǵa jýyq tonnany quraıdy. Bul kólemniń shamamen 2 myń tonnasy Túrkistan oblysyna jóneltiledi.
«Osylaısha, Shymkent óńdeý zaýyty tarapynan óńirde benzın tapshylyǵyn týdyratyndaı esh negiz joq. QMG dıspetcherlik-saraptaý ortalyǵynyń derekterine sáıkes osy jyldyń 10 jeltoqsanyndaǵy jaǵdaı boıynsha Túrkistan oblysynyń munaı bazalarynda AI-92 markaly benzın qory 15,4 myń tonna, bul oblystyń 12 kúndik tutynýyna teń», delingen habarlamada.
Budan bólek, kompanııa ókili, benzın tapshylyǵy Pavlodar munaı-hımııa zaýytyndaǵy jóndeý jumysymen baılanysty aqparat shyndyqqa janaspaıtynyn, sebebi PMHZ-da jóndeý jumystary osy jyldyń qazanynda aıaqtalǵanyn aıtty.
Eske salaıyq, osyǵan deıin Túrkistanda janarmaıǵa qatysty shý shyqty. Ol tek iri janarmaı quıý stansııalarynda ǵana qoljetimdi boldy. Jaǵdaıǵa qatysty oblys ákimdigi óńirdegi janarmaı tapshylyǵy Pavlodar zaýytynyń ýaqytsha jóndeý jumystaryna tikeleı baılanysty ekenin aıtty.
