Úkimet basshysy jańa óndiris oryndary men áleýmettik-mádenı ınfraqurylym nysandarynyń ashylý saltanatyna qatysyp, sonymen birge qaraǵandylyq bir top azamatqa memlekettik nagradalardy tabys etti.
Premer-Mınıstr Táýelsizdiktiń 30 jyldyǵyna arnalǵan saltanatty is-sharada Qaraǵandy oblysynyń joǵary ekonomıkalyq áleýetke ıe ekenin jáne óńirdiń elimizdiń áleýmettik-ekonomıkalyq damýyna úlken úles qosyp otyrǵanyn atap ótti.
Oblysta 1991 jyldan bastap jalpy óńirlik ónim 24 ese ósken. Qaraǵandylyq kásiporyndar eldegi tas kómirdiń 34%-dan astamyn, temir keniniń 14,5%-yn, mys kenin óndirýdiń 28%-yn, jalpaq prokat pen marganes kenderiniń 100%-yn, tazartylǵan mystyń 82%-yn, tazartylǵan kúmistiń 32,7%-yn jáne tazartylǵan altynnyń 11,1%-yn óndiredi. Oblys Qazaqstandaǵy barlyq óńdelgen ónimniń besten bir bóligin (nemese 21%) shyǵarady jáne elimizdiń qýatty ındýstrııalyq ortalyǵy bolyp sanalady.
Indýstrııalandyrý baǵdarlamasy óńirde buǵan deıin shyǵarylmaǵan, qosylǵan quny joǵary ondaǵan jańa ónim túrin óndirýdi uıymdastyrýǵa múmkindik berdi. Oblysta sheteldik seriktestermen birlesip jolaýshylar avtobýstaryn, karerlik jáne jol tehnıkasyn qurastyrý jobalary iske asyrylyp jatyr. Jyl saıyn 1100 avtobýs pen 400 birlik arnaıy tehnıka jáne arnaıy kólik shyǵarý josparlanyp otyr. Ishki jáne eksporttyq naryqtarda keıinnen ótkizý maqsatynda jylyna 3,5 mln dana jeńil, jeńil júk jáne júk kóligine arnalǵan avtomobıl shınalaryn shyǵaratyn iri joba iske asyryla bastady. Keleshekte kásiporynnyń qýatyn jylyna 9 mln shınaǵa deıin keńeıtý josparda bar.
Kólik ınfraqurylymy belsendi túrde jańǵyrtylyp keledi, balabaqshalar, mektepter, medısına jáne sport obektileri salynýda. Táýelsizdik jyldary 8 mln sharshy metr turǵyn úı salyndy. Oblystyń áleýetin odan ári damytý aıasynda 2025 jylǵa deıin qurylys, metallýrgııa, hımııa ónerkásibi, energetıka, taý-ken metallýrgııa kesheni, qurylys materıaldary óndirisi, mashına jasaý jáne t. b. perspektıvaly salalarda jalpy somasy 3,5 trln teńge bolatyn 150-den astam mańyzdy ınvestısııalyq jobany iske asyrý kózdelgen.
Memleket basshysy Qasym-Jomart Toqaevtyń Jarlyǵyna sáıkes, Úkimet basshysy Táýelsizdik kúnine oraı Qaraǵandy oblysynyń aýyl sharýashylyǵy jáne ónerkásip kásiporyndarynyń basshylary men jumysshylaryna, memlekettik qyzmetshilerge, bilim jáne ǵylym, densaýlyq saqtaý, mádenıet salalarynyń qyzmetkerlerine jáne kásipkerlerge memlekettik nagradalardy tabys etti.
III dárejeli «Barys» ordenimen «YDD Corporation» JShS quryltaıshysy Erlan Nyǵmatýlın, «Qurmet» ordenimen Qaraǵandy qalasynyń №2 kópsalaly aýrýhanasynyń dırektory Arystan Maǵzumov, «Jáırem taý-ken baıytý kombınaty» AQ basqarma tóraǵasy Sergeı Bartosh, eńbek ardageri Erlan Smaıylov, «Qaraǵandy farmasevtıkalyq kesheni» JShS bas dırektory Sergeı Baron jáne Á. Moldaǵulova atyndaǵy olımpıadalyq rezervtiń oblystyq mamandandyrylǵan mektep-ınternat-kolledjiniń dırektory Erden Halılın marapattaldy.
III dárejeli «Eńbek dańqy» ordenine «ArselorMıttal Temirtaý» AQ KD «Tentek» shahtasynyń taý-ken jumysshysy Bahtııar Mýrzalın, «Qazaqmys korporasııasy» JShS fılıaly – «Jezqazǵantústimet» О́B kran mashınısi Ulmash Tańqybaeva, «Qurylysmet» JShS elektr dánekerleýshisi Rınat Haırýllın ıe boldy.
«Eren eńbegi úshin» medalimen «Mıras» ShQ basshysy Sámet Babaqov, Qaraǵandy akademııalyq mýzykalyq komedııa teatrynyń ártisi Anna Bespalova, Qaraǵandy oblysy ishki saıasat basqarmasynyń «Rýhanı jańǵyrý» óńirlik jobalyq keńsesiniń basshysy Aıtbaı Jumaǵulov, «Suńqar 2015» JShS basshysy Vıktor Letýta nagradtaldy.
«Shapaǵat» medalimen Qaraǵandy qalasynyń №5 emhanasynyń dırektory Maral Baıazıtova jáne professor H. J. Maqajanov atyndaǵy kópsalaly aýrýhananyń neırohırýrgııa ortalyǵynyń jetekshisi Ǵabıt Mahambaev marapattaldy. QR Qurmet gramotasy Úshtóbe tirek mektebiniń dırektory Sáýle Artyqbaevaǵa tabys etildi.
Jumys sapary barysynda Úkimet basshysy «Forever Flourishing (Middle Asia) Pty Ltd» JShS jobasynyń II kezeńi – bolat prokaty men shvellerler shyǵarý jelisin iske qosý rásimine qatysty. Mundaǵy óndiris qýaty jylyna 90 myń tonna ónimdi quraıdy. Joba elimizdiń qurylys salasyn bolat prokatymen qamtamasyz etýge jáne óńdeý ónerkásibiniń eksporttyq áleýetin arttyrýǵa múmkindik beredi.
Sonymen qatar Premer-Mınıstr Saran qalasyndaǵy «Saran» ındýstrııalyq aımaǵyna baryp, onda «Allur» jáne «Tatneft» tobynyń jylyna 3,5 mln shına shyǵaratyn «KamaTyresKZ» shına zaýytyn salý jónindegi birlesken jobasynyń iske asyrylý barysymen tanysty. «Tatneft» JAQ bas dırektory Naıl Maganov búgingi kúni jobalaýdyń 78%-ǵa jáne qurylys-montajdaý jumystarynyń 20%-ǵa oryndalǵanyn baıandady. Qurylysty 2022 jyldyń IV toqsanynda aıaqtaý josparlanǵan. Kásiporyn 1100-den astam jańa jumys ornyn ashady.
Úkimet basshysyna Reseı Federasııasynyń eń iri shına ónerkásibi kásipornynda Nıjnekamskide (Tatarstan) oqyp jatqan bolashaq zaýyt mamandary shyǵarǵan alǵashqy shına kórsetildi.
Sondaı-aq Asqar Mamın Oqýshylar saraıynda bolyp, balalardyń ǵylymı-tehnıkalyq, mýzykalyq-estetıkalyq, psıholıngvıstıkalyq, kórkemdik jáne basqa da baǵyttaǵy úıirmelerge qatysýy úshin jaǵdaılar jasalǵan jańadan boı kótergen mekemeniń tynys-tirshiligimen tanysty.
Qaraǵandy oblysy
