Qala turǵyndaryn egemendiktiń torqaly toıymen quttyqtaǵan ol otyz jyldyń ishinde Qazaqstan óz memlekettiligin tolyq qalyptastyrǵanyn jáne irgesin bekitip, shekarasyn shegendegenin atap ótti.
Senat Spıkeri Tuńǵysh Prezıdent – Elbasy Nursultan Nazarbaevtyń syndarly saıasatynyń arqasynda elimiz halyqaralyq qaýymdastyqtyń beldi ári belsendi múshesine aınalǵanyn, jańa elordamyzdyń salynǵanyn jáne óńirlerdiń de qarqyndy túrde ósip-órkendegenin tilge tıek etti.
«Táýelsizdik Almatynyń damýyna tyń serpin berdi. Sonyń nátıjesinde shahar elimizde ǵana emes, búkil postkeńestik keńistikte eń qarqyndy damyp kele jatqan qýatty ekonomıkalyq megapolıske aınaldy. Elimizdiń árbir besinshi kásipkeri osy qalada eńbek etýde», dedi Máýlen Áshimbaev.
Sonymen qatar Senat Tóraǵasy qazirgi tańda memleketimizdiń aldynda Prezıdent Qasym-Jomart Toqaev belgilep bergen jańa mindetter turǵanyna nazar aýdaryp, barlyq salada azamattardyń áleýmettik jaǵdaıyn jaqsartýǵa arnalǵan júıeli reformalar iske asyrylyp kele jatqanyn aıtty.
«Búginde shaǵyn jáne orta bıznesti qoldaýǵa baǵyttalǵan bastamalar júzege asyrylyp jatyr. El Prezıdentiniń tapsyrmasymen pandemııa kezeńinde azamattar men kásipkerlerge qoldaý kórsetý úshin daǵdarysqa qarsy sharalardyń toptamasy qabyldandy. Bul reformalardyń bári júıeli sıpatqa ıe. Olar Táýelsizdigimizdi nyǵaıtýǵa jáne azamattarymyzdyń ómir súrý sapasyn arttyrýǵa baǵyttalǵan», dedi Palata Tóraǵasy.
Sondaı-aq Máýlen Áshimbaev Memleket basshysy Qazaqstannyń jahandyq básekege qabilettiligin arttyrýdyń negizgi tiregi sanalatyn aglomerasııanyń damýyna basa mán berip otyrǵanyn jetkizdi. Senat Spıkeri bul rette Almatynyń áleýeti zor ekenin de qaperge saldy.
«Almatyda sapaly adam kapıtaly shoǵyrlanǵan. Munda bolashaqtyń ekonomıkasyn «jańǵyrtý ózegi» sanalatyn kreatıvti orta men belsendi azamattyq qoǵam qalyptasty. Elimizdiń ár óńirindegi daryndy jastar osy qalaǵa aǵylýda. Almaty – ǵylymı-zertteý jáne tájirıbelik-qurastyrý jumystaryna ınvestısııa salý boıynsha kóshbasshy shahar. Memleket basshysy atap ótkendeı, bul qalanyń kreatıvti ekonomıkany damytý jónindegi tájirıbesin búkil elge taratý qajet», dedi Máýlen Áshimbaev.
Ol osy áleýetti tolyq paıdalaný úshin el Prezıdentiniń tapsyrmasymen jańa «Aglomerasııalar týraly» zań jobasy ázirlenip jatqanyn atap ótti. Palata Spıkeriniń aıtýynsha, Parlament depýtattary Almaty sııaqty iri jáne keleshegi zor aglomerasııalardy odan ári damytý úshin pármendi zańnamalyq baza qurý boıynsha barlyq qajetti sharalardy qabyldaıdy.
Almaty ákimi Baqytjan Saǵyntaev saltanatty jıynǵa qatysýshylarǵa arnaǵan sózinde tarıhı turǵydan Táýelsizdiktiń besigine aınalǵan megapolıstiń erekshe rólin atap ótti. 1991 jyldyń 16 jeltoqsanynda Almatyda Qazaqstan Respýblıkasynyń egemendigi resmı túrde jarııalandy, munda táýelsiz memlekettiń negizgi qujattary qabyldandy.
«Almatyda el úshin mańyzdy sheshimder qabyldandy, Konstıtýsııa, Memlekettik rámizder qabyldandy, Qarýly Kúshter quryldy, ulttyq valıýta engizildi. Tuńǵysh Prezıdent saılaýynyń jalpyhalyqtyq nátıjeleri de Almatyda jarııalandy. 1998 jyly Tuńǵysh Prezıdent «Almatynyń erekshe mártebesi týraly» Zańǵa qol qoıdy», Elbasy Almatyny «Táýelsizdiktiń altyn besigi» degenin atap ótti Baqytjan Saǵyntaev.
Saltanatty jıyn barysynda Máýlen Áshimbaev pen Baqytjan Saǵyntaev el Prezıdentiniń atynan Otanymyz ben qalanyń ósip-órkendeýine aıryqsha úles qosqan almatylyqtardy memlekettik nagradalarmen marapattady.
«Qazaqstan bul mereıli beleske tolaıym tabyspen jetip otyr. Endi aldymyzda jańa aýqymdy mindetter tur. Bul rette qolymyzdaǵy bardy baǵalap, jetistikterimizdi eseleı túsýdiń mańyzy zor. Osy jolda bárimiz Táýelsizdigimizdi saqtaý, qorǵaý jáne nyǵaıtý úshin bar kúsh-jigerimizdi jumsaýymyz qajet», dedi Máýlen Áshimbaev.
Is-shara sońynda Senat Tóraǵasy almatylyqtardy memleket tarıhynyń mańyzdy kezeńi sanalatyn Táýelsizdiktiń 30 jyldyǵymen taǵy bir márte quttyqtap, barsha qala turǵyndaryna elimizdi damytý jolynda jańa jeńister men jetistikter tiledi.
