Sondyqtan Qazaqstan Táýelsizdigi shejiresi kóshbasshy men kýágerler kózimen, sózimen búgin jazylyp jatqany – qaı jaǵynan da jarasymdy. Otyz jylda tutas halyqty bir múddege jumyldyrý, basty baılyǵymyz – adam resýrsy men sanyn kóbeıtip, ortamyzdy toltyrý, túrli syn-qaterge qarsy turyp, tótep berý, urpaǵymyzdyń memleketshil sana-sezimin oıatý ońaıǵa túspedi.
Barlyq salada bıik beles, aıtýly asý bolǵany ras. Sonyń ishinde kóńildi demdeıtin, sezimdi qanaǵattandyratyn, tózimdi shyńdaı túsetin túıdek-túıdek tujyrymdar jasalypty. Taǵy bir qaıtalap oqyp kórińizdershi, derektik te, tujyrymdamalyq ta oljaǵa kenelesizder.
«Biz jańa zamanda qantógiske jol bermeı, qasıetti kıemiz – Táýelsizdikke sabyr men tózimdilik, aqyl men parasat arqyly qol jetkizdik».
«Eńbek et, otbasyńdy asyra, elińe qyzmet qyl: óziń de tabysty bolyp, Otanyńnyń da qýaty artady».
«Koronavırýs dertinen týyndaǵan pandemııa álemdik ekonomıkany ǵana emes, óndiris pen eńbekti uıymdastyrýdy, ǵylym men tehnologııa damýyn, jalpy adamnyń oılaý júıesin aıtarlyqtaı ózgertti».
«Prezıdent aýysady, biraq Táýelsizdik máńgilik bolýy kerek. Ár qazaqstandyq aldaǵy ýaqytta onyń tuǵyryn nyqtap, eńsesin tiktep, abyroıyn asyrýǵa qyzmet etýge tıis. «Máńgilik el» ıdeıasynyń túpki maqsaty osynda».
Túsinip oqyǵan, zerdelep toqyǵan adam úshin bul syr-tolǵaý – azat eldiń burynǵy-sońǵy dáýirnamasy, jylnamasy ǵana emes, árbir zamandastyń, keler urpaqtyń sanasyna sińiretin sabaq, tanymyn keńeıtetin qoǵamtaný sheberlik synyby bola alady.
Darhan MYŃBAI,
Májilis depýtaty
