Meniń eńbek jolym sonaý tyń ıgerý jyldary bastaldy. 1956 jyldan bastap tyńger jastarmen qoıan-qoltyq aralastym. Qysta sovhozdyń malyn baǵyp, jazda traktor tizginine otyrdym. Onan keıingi jyldary ár túrli jaýapty qyzmetter atqardym. Elbasynyń maqalasyn oqyp otyryp, ózim kýá bolǵan myna bir jaı esime oraldy.
Elbasy sonaý toqsanynshy jyldary, alǵashqy Prezıdent saılaýy qarsańynda bizdiń óńirge kelip, oblys aktıvimen kezdeskeni esimde. Sol jıynda Nursultan Nazarbaev minberge shyǵyp uzaq sóıledi. Bir ańǵarǵanym, onyń el jaǵdaıyna jete qanyqtyǵy. Alda talaı aýyrtpalyqtar kútip turǵanyn, alaıda ol synnan óte almaǵan halyqtyń bolashaǵy bulyńǵyr bolatynyn aıta kelip, halyqqa qıyndyqtan shyǵý joldaryn túsindirdi. «Táýelsiz memleket qurý buryn-sońdy bizdiń tájirıbemizde bolǵan joq. Biraq dana halqymyzda «Sheshingen sýdan taıynbaıdy» degen naqyl bar, biz qazir keńestiń kónergen shapanyn ıyǵymyzdan ysyryp tastap, táýelsizdik degen alyp muhıttyń jaǵasynda turmyz. Ol muhıt syrttaı sulý kóringenimen, el bolyp eskegimizdi teń espesek, qaýipti aýyr tolqyndary túpsiz tuńǵıyǵyna tartyp áketýi múmkin. Sondyqtan, eń birinshi birlik, sodan keıin tirlik kerek», degeni jadymda jattalyp qalypty.
Nursultan Nazarbaev sózin aıaqtap bolǵan soń, zaldan kóptegen suraqtar tústi. Sonyń bárine taban astynda, qysqa da, nusqa kóńilge qonymdy jaýap berip jatty. Ol kez jeltoqsan oqıǵasynan keıin bizdiń bas kótere almaı júrgen kezimiz edi. Sol jerde otyrǵan Saǵyndyq Oryntaev joldasym ekeýmiz ózge tildi aýdıtorııany áp-sátte baýrap alǵan baýyrymyzǵa keremet rıza bolyp, tóbemiz kókke jetkendeı boldy. Osydan keıin-aq, el tizgini naǵyz laıyqty tulǵanyń qolynda ekenine kúmánim qalmady. Men óz basym sol alasapyran zamanda saıası arenada Nursultan sııaqty batyl qımyldaıtyn, jigerli qazaqtyń bolǵanyn taǵdyrdyń bizge jasaǵan eń úlken syıy dep bilemin.
Muny aıtyp otyrǵan sebebim, Elbasynyń «Táýelsizdik taǵylymy» atty maqalasynda aıshyq tapqan kesek oılar men búginde elimiz baǵyndyrǵan bıik belesterdiń kóbi sol jıynda alda oryndalatyn maqsattar, júzege asyrylatyn jospar-mindetter retinde aıtyldy. Maqalany oqyp otyryp, Nursultan Nazarbaev elimizdiń keleshek damý baǵytyn osydan otyz jyl buryn aıqyndap qoıǵan eken ǵoı degen oıǵa qaldym. Sol minberde aıtylǵan aýyrtpalyqtardy búginde birlik pen tabandylyqtyń arqasynda túgeldeı eńserip, kemel keleshekke umtylǵan táýelsizdigi baıandy elge aınaldyq. Sondyqtan Tuńǵysh Prezıdenttiń Táýelsizdiktiń 30 jyldyǵyna oraı aıtqan taǵylym-ósıetin Qazaqstannyń árbir azamaty, ásirese, óskeleń urpaq – jastar jadyna toqyp, ónege alýy kerek dep bilemin.
Myrzaǵalı QURMANOV,
zeınetker
Qostanaı oblysy,
Tobyl qalasy
