Jańa zamandaǵy Qazaqstan – júıeli reformalardy sátti júzege asyra bilgen, qaryshtap damý ústindegi jáne bolashaǵyna senimmen kóz tastap otyrǵan memleket. Elimiz qysqa tarıhı kezeńde ekonomıka, saıasat, áleýmettik salalarda aýqymdy jetistikterge qol jetkizip, álemdik arenada tanyla bastady. Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń kóshbasshylyǵy elimizdiń HHI ǵasyrda damýynyń syrtqy saıasattaǵy kópvektorlylyq pen memlekettiń jasampaz bitimgershilik bastamalary syndy ózekti faktorlaryn anyqtady.
Dóńgelek ústelge qatysýshylardyń nazaryna Qazaqstan Táýelsizdiginiń qalyptasý tarıhyna qatysty zańdyq jáne normatıvti qujattardyń mátinderi, strategııalyq josparlar men Qazaqstannyń ishki jáne syrtqy saıasatynyń qujattary keltirilgen tarıhı-qujattyq kórme usynyldy.
Sharaǵa Táýelsizdiktiń alǵashqy jyldaryndaǵy birqatar saıası sheshimderdiń qabyldanýyna tikeleı atsalysqan kórnekti memleket jáne qoǵam qaıratkerleri, ǵylymı jáne shyǵarmashylyq ıntellıgensııa, ulttyq-mádenı ortalyqtardyń ókilderi, ál-Farabı atyndaǵy QazUÝ jáne Abaı atyndaǵy QazUPÝ oqytýshylary men stýdentteri qatysty.
Is-sharanyń ashylý barysynda Qazaqstan Respýblıkasy Prezıdenti Arhıviniń dırektory J.Ábdiqadyrova búginde qoǵamnyń rýhanı qundylyǵyn jandandyrý, ulttyq sana-sezimniń, ulttyq maqtanyshtyń artýynyń belsendi úrdisi júrip jatqanyn atap ótti. Arhıv qujattary – kóne zamannan qazirge deıingi Qazaqstannyń shynaıy tarıhyn qalpyna keltiretin tarıhı jady. Arhıvtik murany saqtaý memlekettik mańyzdy bastamalarǵa negiz bolatyn, olardyń aqparattyq mańyzdylyǵyn aıtpaǵanda, memlekettiliktiń nyshany bolyp tabylady. Arhıvterge eldiń tarıhı murasyn saqtaý jáne kóbeıtý, sonymen qatar, arhıv qujattaryn – tarıh kýálikterin zerdeleý negizinde azamattardyń tarıhı sanasyn qalyptastyrý jáne ulttyq sana-sezimdi damytý, patrıotızmdi darytýdy qamtamasyz etý mindeti júktelgen. Memleket basshysy Q.Toqaev «Táýelsizdik bárinen qymbat» maqalasynda: «Azattyq tańyn óz kózimen kórgen aldyńǵy býyn bolmasa, keıingi jastar ótken ǵasyrdyń 90-jyldaryndaǵy tarıhı oqıǵalardyń tereńine boılap, mánin jete túsine bermeıdi. Táýelsizdikke taǵdyrdyń bere salǵan syıy retinde qaraıdy. Shyn mánindegi ahýal olaı emes. Elbasy sol kezdegi saıası, ekonomıkalyq, áleýmettik, demografııalyq jáne basqa da jaǵdaılarǵa baılanysty jeti ret emes, jetpis ret ólshep, bir ret kesýge májbúr boldy. Biz tyǵyryqtan shyǵar joldyń sańylaýy da kórinbeıtin qıyn kúnderden qaqtyǵys pen qantógiske urynbaı aman shyǵyp, eshkimge esemizdi jibermeı, jańa sıpattaǵy Qazaq memleketin qurdyq. Búgingi jáne bolashaq urpaq muny árdaıym bilip otyrýy kerek. Sol úshin Qazaqstannyń jańa tarıhyn da júıeli zerttegen jón» dep atap ótken.
Dóńgelek ústeldiń qurmetti qonaqtary bolǵan Orazaly Sabden men Nurlan Orazalın Qazaqstannyń Táýelsizdigi týraly tarıhı qujat qabyldanǵan kezde Qazaqstan Respýblıkasy Joǵarǵy Keńesiniń depýtattary bola otyryp, Táýelsizdiktiń qalyptasý kezeńindegi birqatar mańyzdy zańdardyń daıyndalýyna tikeleı atsalysqan. Olar keńes qoǵamy men memleket ómiriniń barlyq salalaryna áser etken KSRO-nyń eń tereń daǵdarysy ekonomıkalyq salada erekshe ótkir sezilgenin atap ótti. Sondyqtan ekonomıka salasyn aldyńǵy jolǵa qoıý Tuńǵysh Prezıdent – Elbasy N.Á. Nazarbaev pen onyń komandasy qyzmetiniń basty baǵyttarynyń birine aınaldy.
