Ár jyldary álemdik jáne qurlyqtyq jarystarda jeńis tuǵyryna kóterilgen balýandar arasyndaǵy beldesýlerdi kórýge kórermen kóptep jınaldy. Ásirese, 77 kılo salmaq dárejesinde básekelestik tym kúshti boldy. Atyraýlyq Maqsat Erejepov, qostanaılyq Tamerlan Shadýkaev jáne Demeý Jadyraev arasyndaǵy tartys óte shıelenisti ótti. Osylardyń arasynan Maqsattyń mysy basym boldy. 60 kılo salmaqta tosyn nátıje tirkeldi. Fınalda óskemendik Ernur Fıdahmetov pen qyzylordalyq Aıdos Sultanǵalı saıysqa túsip, bul tartys Kendi Altaıdan kelgen apaıtóstiń paıdasyna sheshildi. 97 kılo salmaqta talaı baıraqty básekede atoı salǵan Erulan Ysqaqovty oıda-joqta esimi kópshilikke beımálim Almaty oblysynyń ókili Sanjar Serikqan san soqtyryp ketti.
Sondaı-aq beldesýler qorytyndysy boıynsha petropavldyq Amanǵalı Bekbolatov (55 kılo), aqtóbelik Meırambek Aınaǵulov (63 kılo), shymkenttik Meıirjan Shermahanbet (67 kılo) pen Álimhan Syzdyqov (130 kılo), túrkistandyq Abylaıhan Ámzeev (72 kılo), taldyqorǵandyq Dıas Qalen (82 kılo) jáne óskemendik Nursultan Tursynov (87 kılo) bas júldeni qanjyǵalaryna baılady.
