Aımaqtaǵy zııaly qaýym ókilderi bas qosqan jıynda oblys ákiminiń orynbasary Serik Ahmet jınaqtyń mán-mańyzyna toqtalyp, aımaqtaǵy BAQ tarıhyn túgendeýdegi jergilikti «Syr medıa» JShS mamandarynyń eńbegin aıryqsha atap ótti.
– Dástúrli BAQ pen búgingi medıa damýdyń jańa satysyna kóterilgen qazirgideı kezeńde aımaq jýrnalıstıkasynyń tarıhyn túgendeý quptarlyq is. О́ńir jýrnalıstıkasynyń burynǵysy men búgingisin beınelegen bestomdyqtyń Táýelsizdigimizdiń 30 jyldyq mereıtoıy qarsańynda oqyrmanǵa jol tartýy zor qýanysh, – dedi oblys ákiminiń orynbasary.
Jınaqtyń I tomynda «Syr boıy», «Kyzylordınskıe vestı», «Aqmeshit jastary» gazetteriniń, «Syr medıa» JShS tarıhy toptastyrylǵan. Ekinshi tomda «Aqmeshit aptalyǵy» men aýdandyq 7 basylym týraly derekter jınaqtalsa, úshinshi kitap aımaqtaǵy elektrondy BAQ, baspahana tarıhy jáne respýblıkalyq BAQ tilshileri týraly. Jınaqta táýelsiz basylymdar jónindegi málimet pen Syr boıynan shyqqan belgili jýrnalıster tájirıbesi, sheberlik dáristeri toptastyrylǵan.
Senat depýtaty Nurtóre Júsip gazet betinde ár kezeńniń tynys-tirshiligi aıqyn kórinip turatyndyqtan kitap el shejiresi dep ataýǵa laıyq degen oı aıtty. «Kezinde Keńes baspasóziniń tarıhyn jattap óstik, shetel baspasóziniń ótkeninen de habarymyz bar. Búgingi bestomdyq osyǵan deıin eskerýsiz qalyp kelgen ulttyq jýrnalıstıka tarıhyn túgendeýdegi tolymdy eńbek bolyp tur» dedi senator.
Jıynda Qazaqstan Jýrnalıster odaǵynyń tóraǵasy Seıtqazy Mataev, belgili jýrnalıst Bıbigúl Jeksenbaı oı-pikirlerin ortaǵa saldy. Ulttyq ǵylym akademııasynyń korrespondent-múshesi Amantaı Shárip Táýelsizdiktiń 30 jyldyǵyna oraılastyrylǵan bastama basqa aımaqtar men jýrnalıster daıarlaıtyn beldi oqý oryndaryna úlgi bolýy tıistigin atap ótti.
– Qolymyzǵa jańa tıip otyrǵan kitapty paraqtap shyǵýǵa ǵana úlgerdik. Sonyń ózinde eńbektiń tek estelikter emes, ǵylymı negizdi jumys bolǵanyna kózimiz jetip, kóńilimiz tolyp otyr. Eń bastysy, oblystan shyǵatyn basylymdar, elektrondy BAQ, qazirgi jańa medıa qamtylǵan. Ondaǵy materıaldar mazmunyna saraptama jasalǵan, – dedi ǵalym.
«Syr medıa» JShS bas dırektory Amanjol Ońǵarbaev oblys ákimdigi qoldaýymen jaryq kórip otyrǵan jınaqty daıyndaýǵa seriktes mamandarymen birge áriptesterdiń barlyǵy atsalysqanyn atap ótti.
– Biz osy ýaqytqa deıin «Syr boıy» gazetiniń alǵashqy redaktory Jıenǵalı Tilepbergenov dep keldik. Al Reseıdiń memlekettik kitaphanasynan tabylǵan málimette birinshi nómirde redaktor retinde Batyrǵalı Kalıýkovtyń aty kórsetilgen. Kalıýkov pen Tilepbergenovtiń arasynda basylymǵa jetekshilik etken azamattar da bar eken. Aýdandyq arhıvterdegi kóp málimetterdiń joıylyp ketkeni de biraz qıyndyq týdyrdy. Aımaqtan shyqqan jýrnalısterge arnalǵan tom Qaljan Qońyratbaev, Mustafa Shoqaı sekildi ardaqtylarymyzdan bastalyp otyr, – dedi Amanjol Saqypuly.
Is-shara sońynda «Syr jýrnalıstıkasynyń tarıhy» 5 tomdyǵynyń lentasy saltanatty túrde qıylyp, qalyń oqyrmanǵa jol tartty.
QYZYLORDA
