«Bıyl 2022 jyldan 2025 jylǵa deıin aıaqtaý merzimimen 129 myń tonna balyq ósirý kólemimen 32 jobany iske asyrý bastaldy. Shamamen 182,0 mlrd teńge ınvestısııa tartý kózdelip otyr», dedi Ahmetjan Pirimqulov Úkimet otyrysynda.
Atap aıtqanda, Aqmola oblysynda bekire ósirý boıynsha «Akvafaktorııa» JShS jobasy boıynsha memlekettik saraptamanyń oń qorytyndysy alyndy. Qaryzdy saqtandyrý shartyn jasasý máselesi sheshilýde. Bul qurylysty bastaý úshin 2,7 mlrd teńge kóleminde qaryz qarajatyn paıdalanýǵa múmkindik beredi.
«Qaraǵandy oblysynda «Saryarqa» AEA aýmaǵynda qýattylyǵy táýligine 300 tonnaǵa deıin balyq azyǵyn óndiretin zaýyt salý jobasy boıynsha jumystar júrgizilýde. Sondaı-aq, jyl sońyna deıin Ázerbaıjan, Germanııa jáne Izraıl mamandaryn tarta otyryp, jobalaý aıaqtalady. Investısııa kólemi - 30 mlrd. teńge. Bes joba boıynsha Almaty, Jambyl, Qostanaı jáne Mańǵystaý oblystarynda qurylys-montajdaý jumystary júrgizilýde. Eki joba boıynsha Almaty oblysynda sý qoımalary bekitilgen. Biz memlekettik organdarmen jáne oblys ákimdikterimen birlesip, baǵdarlamanyń barlyq kórsetkishterin júzege asyrý jáne qol jetkizý, sondaı-aq ınvestısııalyq jobalardy iske asyrý boıynsha jumystardy jalǵastyratyn bolamyz», dedi vıse-mınıstr.
