Áleýmettik jelide Almaty polısııasy emhanasyn basqaratyn Álııa Sarmasaevanyń týystarynyń vıdeoúndeýi tarady. Týystary men advokattyń aıtýynsha, áıel bes myń teńge kóleminde para aldy degen kúdikpen ustalǵan. Aıtýlarynsha keńseni tintý kezinde bul aqsha tabylmaǵan.
«О́kinishke oraı, Álııanyń kúıeýi qaıtys boldy. Onyń eki qyzy bar, biri jaqynda jumysqa ornalasyp, synaq merziminde júr, ekinshisi stýdent. Ekeýi de bilim grantynyń ıegeri. Álııanyń otbasy jaldamaly páterde turady, oǵan týystary kómektesedi», delingen vıdeoda.
Vıdeoda kúdiktiniń advokaty Sáýle Kópjanova da bar. Ol Álııa Sarmasaevanyń qaramaǵyndaǵy qyzmetkerdiń ótinishi boıynsha ustalǵanyn aıtady.
«Qazir sybaılas jemqorlyqqa qarsy kúres júrip jatyr, biraq keıbir aımaqtarda ol farsqa aınalyp jatyr. Birneshe mıllıard urlaǵany úshin ustalǵandar eshqaıda ketpeý týraly qolhatpen úı qamaýynda otyr. О́kinishke oraı, 36 jyldyq tájirıbesi bar dárigerge bes myń teńge para aldy degen aıyp taǵylyp jatyr, biraq ol ómir boıy páter satyp almaǵan. Jemqorlar olaı ómir súrmeıdi. Al qarapaıym dárigerdi densaýlyǵyna baılanysty ýaqytsha eńbekke jaramsyzdyq paraǵyna aqsha aldy degen kúdikpen qamaýǵa aldy. Biraq Densaýlyq saqtaý mınıstriniń buıryǵyna sáıkes emhana meńgerýshisi bul paraqtardy bermeıdi emes pe?», dedi advokat.
Almaty qalasynyń sybaılas jemqorlyqqa qarsy qyzmet málimetinshe, Sarmasaevaǵa qatysty qylmystyq is ýaqytsha eńbekke jaramsyzdyq paraǵyn ashqany, uzartqany, japqany úshin birneshe ret para alý deregi boıynsha tergelip jatyr.
«Almaty prokýratýrasy kúdikti dep taný jáne áreketti saralaý týraly qaýlyny maquldaǵan. Tergeý barysynda Sarmasaeva qylmystyq prosestiń qatysýshysyna qysym kórsetip, ózin áshkereleıtin aıǵaqtardy ózgertýdi talap etken. Osyǵan oraı sot Sarmasaevaǵa qatysty eki aı merzimge kúzetpen ustaý túrinde bultartpaý sharasyn qoldanýǵa sanksııa berdi», dep habarlady vedomstvo qyzmetkeri.
Sonymen qatar, advokat Kópjanovaǵa qatysty «Sotqa deıingi is júrgizý derekterin jarııa etkeni úshin is júrgizý sheshimi», qabyldanatyny aıtyldy.
