Foto: Aleksandr Kýprıenko
«Pandemııanyń negizgi soqqysy medısına qyzmetkerlerine tıdi. Alǵashqy kúnnen bastap olar aldyńǵy shepte koronavırýspen kúresti. Qala turǵyndaryn atalmysh ınfeksııadan bólek basqa aýrýlardan da emdeıdi. Medısına qyzmetkerleriniń qajyrly eńbeginiń arqasynda myńdaǵan adamnyń ómiri qutqaryldy. El Táýelsizdiginiń 30 jyldyǵy qarsańynda Nur-Sultan qalasynyń medısına uıymdarynyń dárigerleri, orta jáne kishi býyn qyzmetkerleri jalpy 350-den astam maman túrli medaldarmen, nagradalarmen marapattaldy.
Muhtar Esenjanuly qalamyzdyń bas onkolog mamany. Oǵan «Qazaqstannyń Eńbek Eri» ataǵy berildi. Pandemııa bastalǵaly beri Muhtar Esenjanuly naýqastardy emdeý úshin tósek-oryndar daıyndap, shetelden kelgen alǵashqy naýqastardy qabyldady, jańa ınfeksııalyq stasıonardyń jumysyn uıymdastyrýǵa qatysty. Ol basqaratyn kópbeıindi medısınalyq ortalyq COVID-19 ınfeksııasynan 15 myńnan astam naýqasty emdedi.
Sonymen qatar, úılesimdi jumystyń arqasynda ortalyqtyń onkologııalyq bólimshesiniń jumysy bir kúnge toqtaǵan joq. Onkologııasy bar 8 myńnan astam pasıent emdeldi, 3 myńnan astam operasııa jasaldy. Karantın kezinde onkopasıentterge dári-dármekterdi úıge jetkizý uıymdastyryldy. Sonymen qatar, qosymsha ınsýlt ortalyǵy ashyldy, ol josparly jáne shuǵyl pasıentterdi qabyldaıdy.
Elordanyń bas onkologyn «Qazaqstannyń Eńbek Eri» ataǵymen shyn júrekten quttyqtaımyn! Muhtar Esenjanuly taǵy da júzdegen naýqasty aıaqqa turǵyzatynyn bilemin!
El basshylyǵy medısına qyzmetkerlerin qoldaý sharalaryna erekshe nazar aýdarady. Prezıdenttiń tapsyrmasy boıynsha densaýlyq saqtaý salasyn odan ári damytýdy jalǵastyramyz», dep jazdy elorda ákimi.
