Osyǵan oraı, táýelsizdiktiń 30 jyldyq mereıtoıy qarsańynda Otanymyzdyń órkendeýine qosqan eleýli úlesi eskerilgen 2 myńǵa jýyq azamatqa «Halyq alǵysy» medali tabys etildi.
Aıta ketý kerek, volonter jylynda elimizdiń volonterlik qyzmetine qatysýshylar sany úsh esege ósip, qaıyrymdylyqtyń qarqyny arta tústi. Sondyqtan bul joly qoǵamdyq belsendilik tanytyp, ásirese qaıyrymdylyq jáne volonterlik qyzmette eńbektengen azamattarǵa basymdyq berildi.
Máselen, Shyǵys Qazaqstan oblysynyń týmasy Mıhaıl Fedorov kóptegen ıgi isterdiń basynan tabylǵan. Búginde ol úsh gektar aýmaqty kógaldandyrýmen aınalysyp keledi. Aýyl turǵyndary kórshisin «orman saqshysy» dep atap ketken eken.
Taǵy bir úlgili is retinde qýańshylyqpen kúresý úshin qazaqstandyqtarǵa úndeý tastap, jaz boıy shóp shaýyp, jappaı mal qyrylǵan óńirlerge jemshóp jibergen erikti Qurmet Bolathannyń eńbegin atap ótýge bolady.
Jeke bastamalarmen qatar shaǵyn jáne orta kásipkerlik ókilderi tarapynan qaıyrymdylyq jasaý jolyndaǵy belsendilik jyldan jylǵa artyp keledi. Ashat Soltanov, Vasılıı Palaev, Qasymhan Sháripov, Álııa Túsipbekova jáne Narıman Shaqabaev sııaqty kásipkerlerdiń mesenattyq qyzmeti qaıyrymdylyqtyń jarqyn úlgisi desek bolady. Olar el ekonomıkasynyń ósýine úles qosyp qana qoımaı, eldiń ál-aýqatyn arttyrý boıynsha júıeli jumystar júrgizýde.
Eriktilik pen qaıyrymdylyq mysaldarynan bólek, bul joly densaýlyq saqtaý, bilim berý jáne pandemııamen kúreste áli de aldyńǵy qatarda júrgen adamdardyń ómiri úshin mańyzdy basqa da mamandyq ókilderiniń eńbegi nazardan tys qalmady.
Olardyń barlyǵy memlekettik mereke qarsańynda «Halyq alǵysy» medalimen marapattaldy.
Esterińizge sala keteıik, 2020 jyly «Halyq alǵysy» medalimen 5 myńǵa jýyq azamat: onyń ishinde dárigerler, eriktiler, mesenattar, muǵalimder, polıseıler, TJ qyzmetkerleri, jýrnalıster jáne t. b. marapattalǵan bolatyn.
