Jalpy aýdany 15 ga turatyn ortalyqtyń 9,4 ga aýmaǵy kommýnaldyq bazarǵa, al 5,6 ga jeri avtovokzal úshin bólingen. Qala boıynsha búginge deıin qalalyq jáne qalaaralyq baǵytta qatynaıtyn qoǵamdyq kólikterdiń avtovokzaly bolǵan joq. Syıymdylyǵy 750 oryndyq avtovokzalda jolaýshylar termınaly da bolady. Termınal bir ýaqytta 500 adamǵa deıin qabyldaı alady. Bul bastama aımaqtyń logıstıka salasynyń damýyna áserin tıgizbek. Nysan 2024 jyly qoldanysqa beriledi dep josparlanýda.
Prezıdent Qasym-Jomart Toqaev 22 qyrkúıekte Mańǵystaý oblysyna kelgen saparynda óńirdiń áleýmettik-ekonomıkalyq damýy jónindegi jıynda ınflıasııa deńgeıiniń joǵary ekenin, munyń azyq-túlik taýarlary baǵasynyń tez ósýine áser etip jatqanyn aıtty.
Azyq-túlik baǵasynyń qymbattaýyn toqtatý úshin aýyl sharýashylyǵy ónimderine tolyq qol jetimdi ári retke keltirilgen saýda alańdaryn ashýdy tapsyrǵan bolatyn.
«Oblys ákimi Prezıdent tapsyrmasyna sáıkes birqatar naqty mindetti júktedi. Quny 1,5 mlrd teńge bolatyn jobany júzege asyratyn ınvestorlar tabylyp, 36 shaǵyn aýdannan jer ýchaskesi berildi. Jobanyń basty maqsaty – básekelestikti arttyrý arqyly azyq-túlik baǵalarynyń negizsiz ósýin boldyrmaý. Bul óz kezeginde deldalsyz ónim satý arqyly tutynýshylar úshin baǵany turaqtandyrýǵa oń áser etedi. Munda salynatyn qurǵaq qoıma, tońazytqysh jáne muzdatqysh qoımalarǵa jylyna 73 myń tonna ónim saqtalatyn bolady. Investor joba aıasynda 250 jańa jumys orny qurylady dep kútilýde», - dedi Aqtaý qalasy ákiminiń orynbasary Erbol Izbergenov.
