Tuńǵysh Prezıdentke qatysty qundy jádigerlerdiń birazy týǵan ólkesi – Jetisý jerindegi birqatar murajaıda saqtalǵan. Sonyń ishinde aqyn Serik Qalıev basshylyq etetin Qarasaı aýdandyq tarıhı-ólketaný mýzeıi de bar. Rýhanı ortalyqta Nursultan Ábishulynyń balalyq shaǵynan, qyzmettik jolynan syr shertetin zattary túpnusqada nasıhattalýda. Solardyń biri – tapsyryspen arnaıy daıyndalǵan Elbasy N.Nazarbaevtyń qalamsaby. Bul jazý quralyn Italııanyń Montegrappa fabrıkasy óndirgen. Ǵalamtordyń deregine súıensek, mundaı qalamsaptar ony tańdaǵan adamnyń stılin kórsetedi. Bálkim, Tuńǵysh Prezıdenttiń qolyna túsýi de beker emes shyǵar. Jalpy, atalǵan fırmanyń qalamsaptary óte qymbat bolyp sanalady. Ári ony dúnıe júziniń eń bedeldi adamdary, ıaǵnı, saıahatshylar, ánshiler, kásipkerler, sportshylar jáne taǵy basqa bilikti basshylar qoldanady.
Qarasaı aýdandyq tarıhı-ólketaný mýzeıiniń bas qor saqtaýshysy Gúljan Aıanbaevanyń aıtýynsha, ortalyqqa kelýshilerdiń kóbisi jerlesimiz Nursultan Ábishulynyń zattaryna kóp qyzyǵýshylyq tanytady. Olardyń arasynda erekshe kózge túsetini de osy qalamsap eken.
Montegrappa kompanııasynyń Elbasy úshin daıyndaǵan qalamsabynda ulttyq qundylyqqa qatysty nárseler barynsha qamtylǵan. Jazý quralynyń tómengi jaǵynda Qazaqstannyń geografııalyq kartasy ornalastyrylǵan bolsa, joǵarǵy bóliginde memleketimizdiń Eltańbasy beınelengen. Al qalpaǵynyń dál tóbesinen týymyzdy baıqaýǵa bolady. Sondaı-aq onyń betki saqınasynda Qazaqstannyń Tuńǵysh Prezıdenti N.Á.Nazarbaevtyń talaı qujattarǵa qoıǵan qolynyń kórinisi kórsetilgen. Qalamsaptyń qalpaǵymen qosqandaǵy jalpy uzyndyǵy – 14 santımetr.
Rýhanı ortalyqtyń erekshe jádigeri bolyp sanalatyn jazý quraly estelik qorapqa salynǵan. Elbasymyz osy qalamsappen kezinde memlekettik mańyzy bar qujattarǵa qol qoıyp, tipti, kezdesýlerde óziniń jyly lebizderin jazǵan eken.
Dıdar MÁLIKULY
Almaty oblysy,
Qarasaı aýdany
