Táýelsizdiktiń 30 jyldyǵynda Qazaqstan eleýli jetistikterge jetti jáne kúrdeli syn-qaterlerden ótti.
Tól valıýtasyn qoldanysqa engizdi. Aıbyndy áskerin qurdy. Shekaralaryn bekitip, jańa astanasyn saldy. Memlekettik rámizderin bekitti. Ornyqty memlekettik ınstıtýttary bar jáne ekonomıkasy básekege qabiletti demokratııalyq memleket retinde qalyptasty.
Álemdik saýda-ekonomıkalyq júıege tolyq enip, ózin senimdi seriktes retinde kórsete bildi. Búginde álem boıynsha 120-dan astam el Qazaqstanmen dıplomatııalyq qarym-qatynas ornatqan. Bıylǵy mereıtoılyq jylda da elimizde aýqymdy reformalar bastaldy, ekonomıka men áleýmettik sala jańǵyryp keledi.
Pandemııaǵa qaramastan, memleket otandyq bızneske qoldaý kórsetip jatyr. Halqymyzdyń sany 19 mıllıonnan asty. Qazaqstan SSRO taraǵannan keıin araǵa 8 kún salyp, táýelsizdigin jarııalady.
«Táýelsizdiktiń bizdiń bárimizge artar mindeti mol. Endi eńseli el bolýdyń jolyna shyndap túsýimiz kerek. Áýletimizdiń asýy da, dáýletimizdiń tasýy da óz qolymyzda. Keń-baıtaq jerimizdiń baılyǵy osy dalanyń túpkilikti halqyna da, taǵdyr qosyp birge ómir súrip jatqan ózge ult ókilderine de molynan jetedi. Ne istesek te aqylmen isteıik, arzan uranǵa ermeıik, ushpa sezimge erik bermeıik degim keledi», dedi Elbasy Nursultan Nazarbaev 17 jeltoqsanda Almatydaǵy Ortalyq alańda Qazaqstan Respýblıkasynyń memlekettik táýelsizdigi jarııalanýyna oraı ótkizilgen jıynda.
Qazaqstannyń Táýelsizdigin resmı túrde eń alǵash Amerıka Qurama Shtattary moıyndady. Odan keıin Qytaı, Ulybrıtanııa, Mońǵolııa, Fransııa, Japonııa, Ońtústik Koreıa jáne Iran Islam memleketi Qazaqstandy táýelsiz memleket retinde tanydy.
Al Túrkııa birinshi bolyp Qazaqstanda óz elshiligin ashty.
