«Taǵy jeti mekteptiń qurylysy aıaqtaldy. Bul mektepter 20 myńnan astam oqýshy ornyn qurýǵa múmkindik beredi. Mysaly, BINOM SCHOOL jańa formattaǵy ınnovasııalyq mektebine bardym. Jańa bes qabatty mektep 4 myń oqýshyǵa eseptelgen (2 aýysymda). Bul mektepte oqý tegin. Mektepte robototehnıka kabınetteri, kınozal, muǵalimder men balalarǵa arnalǵan kovorkıng-aımaqtar, telestýdııa, smart-synyptar, metall jáne aǵash kesý sheberhanalary, TedxBinom, Speaking Club, úlken kitaphana, oıyn bólmeleri jáne t.b. bar. Binom mektebiniń basty artyqshylyqtarynyń biri – erekshe qajettiligi bar balalar úshin barlyq jaǵdaı jasalǵan. Jańa mektepterdiń esigi 3 toqsannan bastap ashylady.
Bıyl barlyǵy 15 mektep salyndy. Bul shamamen 40 myń oqýshy orny. Jańa mektepter salynǵandyqtan 5 mektep endi úsh aýysymda oqytpaıdy, sondaı-aq, 10 mektepte shamadan tys júkteme máselesi sheshilmek.
Elordada jyl saıyn adamdar sany artyp keledi. Sońǵy 10 jylda oqýshylar sany 3 esege artty. Jyl saıyn birinshi synyp oqýshylarynyń sany túlekter sanynan 3 ese asady. Mysaly, mamyr aıynda 7 myń túlek mektep bitirip shyqsa, birinshi synypqa 25 myń oqýshy keledi. Osy máselelerdi sheshý úshin qalada jyl saıyn kem degende 10 mektep salyp otyrý qajet.
2022 jyly 16 mektep salýdy josparlap otyrmyz. Keshendi jospar aıasynda 5 jyldyq kezeńge 70-ke jýyq mektep salý josparlanǵan. Mektep qurylysyna jeke ınvestısııany da tartamyz. Mektepter qalanyń barlyq aýdanynda, sonyń ishinde eldi mekenderde salynyp jatyr. Oqý oryndaryna qajettilik bar aýdandarǵa nazar aýdaramyz», dep jazdy elorda ákimi.
