Nur Otan partııasynyń 2021-2025 jyldarǵa arnalǵan saılaýaldy baǵdarlamasyn iske asyrý jónindegi respýblıkalyq Jol kartasy boıynsha Qostanaı oblysynda 13 ýchaskelik jáne 5 modýldik polısııa beketin ashý josparlanǵan. Bıyl Qarasý jáne Meńdiqara aýdandarynda eki ýchaskelik polısııa pýnkti ashylǵan bolatyn. Taıaýda Qostanaı aýdanynyń ortalyǵy – Tobyl qalasyndaǵy «Jańarý» saıabaǵynda taǵy bir modýldik polısııa beketi jumys isteı bastady. Shaǵyn beket ınternet jelisimen, baılanys qurylǵylarymen, jumysqa qajetti jıhaz, kompıýterlik tehnıkamen, sondaı-aq kommýnıkasııa jáne qaýipsizdik júıelerimen jabdyqtalǵan.
Jańa bekettiń ashylý rásiminde oblystyq Polısııa departamenti bastyǵynyń mindetin atqarýshy Qaırat Dúısembekov «jurtqa jaqyn polısııa» qaǵıdatynyń mán-mańyzyn tarqata kelip, mundaı zamanaýı beketter búginde elimizdiń basqa óńirlerine de ornatylyp, tıimdi jumys istep jatqanyn, modýldik polısııa beketteri jumys isteıtin aýdandarda qylmys deńgeıi tómendep, adam quqyǵyn buzý derekteriniń aıtarlyqtaı azaıǵanyn aıtty.
Qostanaı aýdany ákiminiń orynbasary Qaırat Qasqabaevtyń aıtýynsha, Tobyl qalasyndaǵy modýldik polısııa beketiniń qurylysyna qajet 10 mln teńge qarjy aýdandyq bıýdjetten bólingen.
– О́z basym jurtqa jaqyn polısııa degendi oqys jaǵdaıǵa tap bolǵan turǵyndarǵa kez kelgen ýaqytta, kez kelgen jerde der kezinde kómekke kele alatyn polısııa dep túsinemin. Halyq kóp jınalatyn ortalyq saıabaqta jumys isteı bastaǵan modýldik polısııa beketi qandaı da bir jaǵdaıda azamattarǵa jedel kómek kórsetip, halyq qoldaýyna ıe bolady ǵoı dep oılaımyn. Prezıdent polısııadan halyqpen etene jaqyn bolýdy talap etip otyr. Polısııanyń servıstik jumys úlgisine kóshýi osy maqsatta júzege asyrylyp jatyr. Bul qala turǵyndarynyń qaýipsizdigin arttyra túsedi, – dedi ákim orynbasary.
Jergilikti polısııa basqarmasynyń basshysy Qurmet Májikenovtiń aıtýynsha, modýldik polısııa beketi jyljymaly túrde jumys isteıtindikten, aldaǵy ýaqytta kommýnaldyq júıeden ajyratylyp, qylmys deńgeıi ósip bara jatqan ózge de aýdandarǵa kóshirilýi múmkin. Bekette táýlik boıy ýchaskelik polısııa ınspektorlary men patrýldik polısııa qyzmetkerleri qyzmet atqaryp, turǵyndardyń jeke aryz-shaǵymdaryn qabyldaıtyn bolady.
Qostanaı oblysy,
Tobyl qalasy
