«Osydan bir jyl buryn IT-keńestiń jumysyn bastadyq. Ol sıfrlyq tehnologııalardy odan ári damytyp, engizýge baǵyttalǵan. IT-keńestegi árbir kezdesý jaı ǵana kezdesý emes, bul qala men turǵyndarǵa qajet naqty jobalardy kásibı turǵyda talqylap, engizý.
Memleket basshysy atap ótkendeı, «sıfrlandyrý – barlyq reformalardyń bazalyq elementi».
Mysaly, pandemııa kezinde pasıentterdi medısınalyq mekemelerge birkelki taratýǵa múmkindik beretin qosymshalar jasaldy, telemedısına engizildi jáne t.b.
Sonymen qatar, IT-keńeste tanystyrylǵan birqatar joba basqa da salalarǵa engizildi. Mysaly, 20-dan astam mektepte hımııa, bıologııa, fızıka sııaqty pánderdi kórneki túrde kórsetýge múmkindik beretin Roqed Science baǵdarlamasy engizildi. Bul oqýshylarǵa materıaldardy túsindirýge múmkindik beredi.
Sonymen qatar birqatar mektepte Smart Recirculation Control jobasy iske qosyldy. Innovasııalyq tehnologııa aýany tazartýǵa jáne zararsyzdandyrýǵa, sol arqyly úı-jaıdy ıonızasııalaýǵa, aýanyń tútindenýine monıtorıng júrgizýge, táýlik boıy beınebaqylaý men vızýaldy baqylaý júrgizýge múmkindik beredi. Sondaı-aq, dene temperatýrasyn ólsheıtin, maskanyń bar-joǵyn birden biletin júıe iske qosyldy.
Qalany aýqymdy sıfrlandyrýdy júrgizetinimiz týraly aıtqan bolatynmyn. Mysaly, ınjenerlik jelilerdi sıfrlandyrý olardyń naqty jaǵdaıyn kórýge, jóndeý jumystaryn ýaqtyly júrgizýge, qajet bolǵan jaǵdaıda qýatty arttyrýǵa, táýekelderdi azaıtýǵa jáne t.b. múmkindik beredi. Qalany sıfrlandyrý jumysy qazir aıaqtalýǵa jaqyn.
Sonymen qatar, usynylǵan jobalardyń arasynda ekologııa, qaýipsizdik, áleýmettik salalardaǵy jobalar da bar. Mysaly, jasyl jelekterdi túgendeý, lıýkterdiń monıtorıngi, zańsyz qoqystardyń aldyn alý jáne anyqtaýdy baqylaý jáne t.b. úshin júıeler ázirlendi. Iriktelgen jobalar tolyqtaı iske asyrylady», dep jazdy Altaı Kólginov
