Respýblıka boıynsha eń úlken orman rezervaty «Semeı ormany» aýmaǵyndaǵy Kanoner fılıalynda ornalasqan. Onda Ortalyq Azııada balamasy joq orman tálimbaq kesheni men aǵash tuqymynyń beketi jumys istep tur. Kononer fılıalynda ınnovasııalyq tehnologııalar arqyly jyl saıyn 3 mln dana jabyq tamyr júıeli seppe kóshetter ósiriledi. Shvedtik tehnologııanyń damyǵany sonshalyq, kádimgi qaraǵaıdyń seppe kóshetteri 2 jyl ishinde emes, bar-joǵy 70 kúnniń ishinde ósip shyǵady. Zamanaýı ádispen bul keshende 5 jyl ishinde qaraǵaıdyń 15 mln kósheti ósirildi.
Aldaǵy bes jylda oblys aýmaǵyndaǵy 40,6 myń gektar jerge 196,8 mln ártúrli aǵash kóshetterin otyrǵyzý josparlanǵan. Onyń ishinde 2021-2025 jyldary orman sharýashylyǵy kommýnaldyq mekemeleri qyzmetkerlerimen 15 myń gektar alańǵa 76 mln túp aǵash, «Semeı ormany» memlekettik orman rezervatynyń aýmaǵynda 119,4 mln túp, Katonqaraǵaı memlekettik ulttyq tabıǵı parkiniń aýmaǵynda 792 myń túp aǵash otyrǵyzylady. Sonymen qatar Asýbulaq, Samar orman sharýashylyǵy mekemelerindegi tálimbaqtarda kóshet egý jumystary júıeli túrde júrgizilip jatyr. Bul týraly Orman sharýashylyǵy jáne janýarlar dúnıesi aýmaqtyq ınspeksııasynyń basshysy Dildábek Orazbaev aıtyp bergen.
– Keshendi jospardy iske asyrý maqsatynda bıyl oblystyń orman jáne tabıǵat qorǵaý mekemeleri 4 151 gektar aýmaqqa orman daqyldaryn otyrǵyzdy. Sondaı-aq ótken jyldardaǵy ekpelerdi tolyqtyrýdy eskere otyryp, 23 mln 581 myń dana aǵash otyrǵyzdy, – deıdi Dildábek Tájibaıuly.
Prezıdent tapsyrmasyna sáıkes orman qoryn molaıtý maqsatynda oblysta ázirlengen keshendi jospar jumysy nátıjeli jemisin berip keledi. Osy tusta aıta keterligi, orman qoryn molaıtý maqsatynda jumystar júrgizilip jatqanymen, jasyl jelekke balta shabatyndar da joq emes. Ásirese jańa jyl qarsańynda shyrsha kesý faktisi ishinara bolyp turady. Al memlekettik mekemelerge shyrsha zańdy túrde bosatylady eken. Máselen, byltyr oblysta 760 túp shyrsha mektep, balabaqshalarǵa berilgen. Kók bazarda satylyp turatyn shyrshalardy kásipkerler kóbinese Reseıden jetkizedi. Odan basqa aımaqta onǵa jýyq jeke menshik tálimbaqtar bar. Olar da shyrshalaryn zańdy túrde sata alady.
Jańa jyl qarsańynda belgili mólsherde jasyl shyrsha qıylǵanymen, orny úsh ese, tórt ese tolyǵyp otyratyny anyq. Oǵan joǵaryda keltirilgen sıfrlar dálel. Deıturǵanmen, úsh-tórt kúndik sharaǵa jasandy shyrsha paıdalanýǵa da bolar edi. Aıtyp ótkendeı, orman qoryn molaıtý maqsatyndaǵy 2025 jylǵa deıingi Prezıdent tapsyrmasy oblysta jalǵasyn tabatyny anyq.
Shyǵys Qazaqstan oblysy
