Otbasy úlgisindegi balalar aýylynyń dırektory Gúlsara Botataevanyń aıtýynsha, Jaıyq ózeniniń jaǵasynda boı kótergen otbasy úlgisindegi balalar aýylynda eki qabatty 8 turǵyn úı bar. Munda 4 úı múmkindigi shekteýli balalar úshin jabdyqtalsa, qalǵany tárbıeshilerdiń balalaryna arnalǵan. Jalpy 80 orynǵa arnalǵan balalar aýylyndaǵy 7 otbasyna 3-18 jas aralyǵyndaǵy jetim jáne ata-anasynyń qamqorlyǵynsyz qalǵan 54 tárbıelenýshi qonystandy. Al, mádenı-sporttyq keshende bı, májilis, sport jáne jattyǵý zaldary qarastyrylǵan. Sondaı-aq monsha men oıyn alańdary oıyn-saýyq jáne damytý quraldarymen jabdyqtalǵan.
Tárbıelenýshiler ákimshilik bloktaǵy kovorkıng-ortalyqta shyǵarmashylyqpen aınalysady. Sondaı-aq, ózin-ózi taný jáne áleýmettik beıimdeý ortalyǵy bar. Zamanaýı konferens-zal balalardyń onlaın-rejımde oqýyna múmkindik bermek.
«Egemendiktiń tańsári shaǵynda jas býynǵa barlyq jaǵdaı jasaldy. Biz úshin ár balanyń qýanyshy men baqytty júzin kórýden asqan shattyq joq. Ásirese, qıyn jaǵdaıǵa tap bolǵan balalardy qamqorlyqqa alyp, qoǵamnan óz ornyn tabýyna qoldaý kórsetýdi jalǵastyra beremiz. Otbasy úlgisindegi balalar aýylynda tárbıelenýshilerdiń alańsyz bilim alýyna, bos ýaqytyn kóńildi, mándi ótkizýine tolyq múmkindik bar», dedi Mahambet Dosmuhambetov.
Otbasy úlgisindegi balalar aýylynyń qurylysyna «Kaspıı qubyr konsorsıýmy» AQ demeýshilik kórsetken.
«Atyraý óńirine qoldaý kórsetý – bizdiń kompanııanyń basty mindetteriniń biri. Búgin biz jańa áleýmettik mańyzy bar nysandardy paıdalanýǵa tapsyrdyq. Bul ata-anasynyń qamqorlyǵynsyz qalǵan balalarǵa asa qajet. Endi balalar aýylyna avtobýs alyp beremiz», dedi kompanııanyń bas dırektory Nıkolaı Gorban.
