«Barys» óz aıdynyndaǵy keıingi oıynda Nıjnekamskiniń «Neftehımıginen» 1:3 esebimen jeńilip qalǵan soń, «Ýrales» arenasyndaǵy básekede jeńis úshin baryn saldy. Ekaterınbýrgtegi kezdesýdiń birinshi kezeńinde esep ashylmady. Úzilisten keıin «Barys» hokkeıshileri oıyn tizginin óz qoldaryna alyp, kezdesýdiń esebin ashty. Darren Dıs komandadan ketkennen keıin kapıtandyq mindetti ózine alǵan shabýylshy Roman Starchenko 34-mınýtta qonaqtardy esepte alǵa shyǵardy.
Úshinshi kezeńde «Avtomobılıst» oıynshylary tarazy basyn teńestirýge qansha tyrysqanymen, Ortıo qorǵaǵan qaqpadan sańylaý taba almady. Bir aıta keterligi, Ionı keshegi oıynda qaqpaǵa baǵyttalǵan 32 soqqyny qaıtardy. Matchtyń aıaqtalýyna 40 sekýnd qalǵanda Lınden Veı bos qalǵan qaqpany dál kózdep, kezdesýdiń núktesin qoıdy – 2:0.
Elorda klýby bul jeńisinen keıin 40 upaımen jetinshi orynǵa kóterilip aldy. Endi jerlesterimiz kelesi oıynyn búgin Qazanda «Ak Barspen» ótkizedi.
