Rýhanııat • 23 Jeltoqsan, 2021

B.Momyshuly týraly kitap túrik tilinde jaryq kórdi

952 ret

kórsetildi

1 mın

oqý úshin

Kúlli qazaqtyń maqtanyshy, Keńes odaǵynyń batyry, áskerı qolbasshy, dańqty strateg, qalamger Baýyrjan Momyshulynyń erlikke toly ómir joly qaı kezde de jastarǵa úlgi ekeni daýsyz. 24 jeltoqsan – Baýyrjan Momyshulynyń týǵan kúni. Qazaq aspanyndaǵy máńgi óshpes shoq juldyz er Baýkeńniń týǵan kúnine oraı uıymdastyrylatyn ıgi is-sharalar legi bastalyp ta ketti, dep habarlaıdy Egemen.kz.

Tabıǵat MUSYLMANQUL

B.Momyshuly týraly kitap túrik tilinde jaryq kórdi

Sýretter Baqytjan Omardyń feısbýktegi paraqshasynan alyndy

Kózi tirisinde qandy qasap maıdannan bólek kóptegen shet memleketterdi aralaǵan Baýyrjan Momyshuly Fıdel Kastronyń shaqyrtýymen Kýbaǵa baryp, Fıdeldiń inisi Raýldi áńgimelerimen baýrap alǵany belgili. Bostandyq aralynan oralǵannan keıin jazǵan «Kýba áserleri» atty týyndysy eldiń júreginde saqtalǵan. Jalpy Baýkeńe degen qurmet ol baqılyq bolǵan soń da tolastaǵan emes. Qazaqstannyń ár qıyrynda onyń atyndaǵy kósheler, mektepter, saıabaqtar jetip artylady. 100 jyldyǵyna oraı 30 tomdyq ta jaryq kórdi...

165496

Er Baýkeńniń rýhyna kórsetilgen taǵy bir taǵzym – Baýyrjan Momyshulynyń 111 jyldyǵyna oraı Ankarada «Türkistan'ın od Balası» atty kitap tusaýynyń kesilýi. Kitaptyń avtory – Anadoly eliniń belgili aýdarmashysy Ashýr О́zdemır. Tamasha kitaptyń shyǵýyna Qazaqstannyń Túrkııadaǵy elshiligi zor yqpal etken eken. Abzal Saparbekuly elshiliktiń eseli eńbeginiń arqasynda osy jyly joǵarydaǵy jınaqty qosa eseptegende 22 kitap jaryq kórgenin atap ótti.