Búginde Qazaqstanda epıdemııalyq ahýal turaqty. El ishinde «qyzyl aımaqta» turǵan óńir joq. «Sary aımaqta» Nur-Sultan qalasy, Pavlodar, Soltústik Qazaqstan oblystary tur, qalǵany – «jasyl aımaqta». Keıingi eki aptada elimizde syrqattaný kórsetkishi 31%-ǵa azaıǵan. Al tórt aıda syrqattaný deńgeıi 16 ese tómendedi.
Degenmen arqany keńge salýǵa bolmaıdy. Úırenshikti «jaýymyzǵa» aınalǵan koronavırýs jańa aıla taýyp, shabýyldaýyn toqtatar emes. Jańa shtamm da jaǵdaıdy shatqaıaqtatyp jiberýi múmkin. Muny Premer-Mınıstrdiń orynbasary Eraly Toǵjanov ta eskertip, memlekettik shekaradan ótý pýnktterinde baqylaýdy kúsheıtý qajet ekenin aıtty.
«Omıkron» shtamynyń belgileri bas aýrýy men qatty sharshaý, deneniń qurysyp, syrqyrap aýrýy eken. Qazir jer-jahandy ábigerge salyp jatqan jańa shtamǵa baılanysty DDU álem jurtyn rojdestvolyq jáne jańa jyldyq josparlardan bas tartýǵa jáne merekelerdi keıinge qaldyrýǵa shaqyrdy. AQSh-ta «Omıkron» shtamyn juqtyrǵandardyń sany eki kún saıyn eselep artýda. Bul elde jańa shtamdy juqtyrý sany bir aptada 8-10%-dan 73%-ǵa deıin ósti. Al Eýropalyq odaq elderiniń úkimetteri «Omıkron» shtamynyń tez taralýyna baılanysty shekteý sharalaryn engizýde. Ásirese, Ulybrıtanııa astanasynda kúnine shamamen 25 myń ınfeksııa juqtyrý derekteri anyqtalýda. Londonda tótenshe jaǵdaı rejimi engizildi. Osy ýaqytta Fransııa men Germanııa brıtandyqtardyń óz memleketterine kirýine tyıym saldy, al Nıderland olar úshin mindetti on kúndik karantın engizdi. Búgingi tańda Ulybrıtanııa azamattary úshin 40-tan astam el jabyldy.
Sondyqtan qaýip qyr astynda turǵanda, qamsyz júrip qapy qalmaıyq!
