Mártebeli syılyqty tapsyrý rásimi aralas formatta uıymdastyryldy. Kele almaǵan azamattar zoom platformasy arqyly qatysýǵa múmkindik aldy. Saltanatty is-shara barysynda Oljas Súleımenovten bólek, Máskeý memlekettik halyqaralyq qatynastar ınstıtýtynyń rektory, Reseı Ǵylym akademııasynyń akademıgi Anatolıı Torkýnov, Reseı-Armıan ýnıversıtetiniń rektory Armen Darbınıan (Armenııa), fızık-ǵalymdardyń avtorlyq ujymynan Aleksandr Týzıkov, Sergeı Zolotoı jáne Sergeı Korenıako (Belarýs), Astrofızıka ınstıtýtynyń dırektory Gúlchehra Kohırova (Tájikstan), Ulttyq ǵylym akademııalarynyń prezıdentteri Murat Jumataev (Qyrǵyz Respýblıkasy) jáne Ion Tıgınıaný (Moldova) syılyqqa ıe boldy.
Jalpy, TMD memleketteriniń belgili tulǵalaryna tabystalyp kele jatqan «Dostastyq juldyzdary» memleketaralyq syılyǵynyń tarıhy 2009 jyldan bastalady. Sol jyldyń 21 mamyrynda resmı túrde bekitilgen marapat jyl saıyn laýreattarǵa tabystalýda. Gýmanıtarlyq yntymaqtastyq memleketaralyq qory taǵaıyndaıtyn dástúrli syılyqty ıelengen azamattarǵa Qurmet belgisi, arnaıy dıplom, kýálik jáne 2 mıllıon Reseı rýbli tapsyrylady.
Laýreattardy marapattaý rásimine gýmanıtarlyq yntymaqtastyq memleketaralyq qorynyń atqarýshy dırektory Anatolıı Iksanov bastaǵan ózge de mártebeli meımandar qatysty. Syılyq ıegerleri beınebaılanysqa shyǵyp, rızashylyǵyn jetkizdi.
Budan bólek is-shara kezinde «Debıýtter dostastyǵy» memleketaralyq syılyǵy da tapsyryldy. Bul marapat qazaqstandyq beıneleý óneriniń sheberi Almas Nurǵojaevqa buıyrdy.
