«Olarda basqa tikushaq joq ekeni belgili boldy. Sondyqtan ákemdi Pavlodardan Nur-Sultanǵa avtokólikpen jiberdi. Jolda qatty shaıqalyp, jaǵdaıy edáýir nasharlady», dedi dárigerdiń uly Danııl Krıvonosenko.
Sergeı Krıvonosenkonyń týystary 15 qarashada anevrızma saldarynan mıyna qan quıylǵanyn málimdedi. Ekibastuz qalalyq aýrýhanasynyń dárigerleri dál ýaqytynda kásibı kómek kórsetkenimen Sergeıge Nur-Sultandaǵy neırohırýrgııalyq ortalyqta shuǵyl ota jasaý qajet bolǵan.
«Kún saıyn ákemdi emdegen dáriger Nur-Sultandaǵy neırohırýrgııalyq ortalyqqa jetkizý úshin sanavıasııaǵa ótinim jiberdi. Bolmaǵan soń, ózimiz Densaýlyq saqtaý mınıstrligine shaǵym jibere bastadyq. Sodan keıin sanavıasııa tarapynan áreket bastaldy. Biraq olar kólik te jibermedi. Nátıjesinde, Pavlodardan avtokólik jiberildi. Operasııa joq degende toǵyzynshy kúni jasalýy kerek edi. Biraq sanavıasııaǵa baılanysty operasııa 7 jeltoqsanda ǵana jasaldy», dep túsindirdi Danııl Krıvonosenko.
Onyń aıtýynsha, operasııadan keıin ákesi esin jımaǵan. 22 jeltoqsanda tańerteńgi saǵat 8-de Sergeı Krıvonosenko qaıtys boldy.
Densaýlyq saqtaý mınıstrligi aqparaty boıynsha, Ulttyq shuǵyl medısınany úılestirý ortalyǵynda 22 qarashada Ekibastuz qalalyq aýrýhanasynan «Ortańǵy mı arterııasynan sýbarahnoıdaldy qan quıylý» dıagnozy bar naýqasty Nur-Sultanǵa jetkizý týraly ótinim túsken.
Ekibastuzdaǵy áýejaıdyń qyzmet kórsetpeýine jáne úlken áýekemeleri úshin ushý-qoný alańynyń jaramsyzdyǵyna baılanysty tikushaq arqyly jetkizý týraly sheshim qabyldanǵan. Keıin qolaısyz meteorologııalyq jaǵdaılarǵa baılanysty tikushaqpen ushý múmkin bolmaǵan. Aýa raıynyń jaqsarǵanyn kútken kezde qashyqtan medısınalyq qyzmet kórsetilgen.
Vedomstvo ókili 26 qarashada Nur-Sultan-Ekibastuz baǵyty boıynsha Mı-8 tikushaǵynda tehnıkalyq aqaý shyǵyp, О́rnek aýyly mańyna májbúrli túrde qonǵanyn málimdedi.
