Kósheneı jyraýdyń ákesi Rústembek, atasy Jıenbaı, arǵy atasy Dúzbenbetter baǵzy ónerdiń baıraǵyn urpaǵyna amanattaǵan jandar. Jalǵannyń jaryǵynda jıyrma jeti-aq jyl ǵumyr keshken Kósheneı osy babalar murasyn ǵylymı aınalymǵa engizip, jyraýlyq dástúrdiń qazirgi sahnalyq kelbetin qalyptastyryp ketti. Sonaý tuqııannan tamyr tartqan ónerdiń shoqtyǵy bıik ókili sanalǵan Kósheneıdi túrki tektes halyqtar ǵalymdary da joǵary baǵalaǵan.
Jyraýdyń bala kezinen bastap, at jalyn tartyp miner shaǵyna deıingi ómiriniń úzigin beıneleıtin qoıylymnan keıin oblystyq máslıhat hatshysy Naýryzbaı Baıqadamov jıylǵan kórermenge lebizin jetkizdi.
– Jyraýlyq ónerge ózgeshe órnek qosqan Kósheneı Rústembekov esimi qazaqpen birge jasaı beretini, urpaq almasqan saıyn jańǵyra túsetini anyq. Ata murasyn jańa beleske kótergen jyraý ómiri keıingi tolqynǵa ólmes ónegege, ózi tarıhı tulǵaǵa aınalǵanyn bilemiz. Osydan az ýaqyt buryn «Qazaqtyń kúmis kómeı Kósheneıi» atty oblystyq jyr festıvali ótti. Al Qarmaqshy aýdanyndaǵy Kósheneı Rústembekov atyndaǵy jyraýlar úıi 15 jyldyń ishinde dástúrli jyrdyń otyn jaqqan talaı daryndy jasty tárbıelep shyǵaryp, óner kóshine qosty, – dedi máslıhat hatshysy.
Qazaqstan Respýblıkasynyń mádenıet qaıratkeri, belgili jyrshy Berik Saımaǵanbetov júrgizgen keshte Kósheneıdiń inisi Bıdas Rústembekov, balasy Arnur Kósheneı jáne elimizge belgili jyrshy-jyraýlar Uljan Baıbosynova, Sholpan Bıimbetova, Maıra Sársenbaeva, Serik Jaqsyǵulov, Rýslan Ahmetov, Aqmaral Noǵaıbaeva, Aıdos Rahmetovter kópshilikke jyrdyń injý-marjanyn tartý etti. Kóneden búginge jetken óner kerýenine jańadan qosylǵan jas talap ónerpazdar da kóp aldyna shyqty.
Jyrsúıer qaýym rýhanı nár alǵan kesh Syrdaǵy súleıler sarynynyń joǵalmaıtynyn, tálimi tozbaıtynyn kórsetti.
