«Memleket basshysynyń QR Prezıdentiniń janyndaǵy ulttyq qoǵamdyq senim keńesiniń úshinshi otyrysynyń qorytyndysy boıynsha bergen tapsyrmasyna sáıkes, JOO-lardy jikteý modeli ázirlendi, ony joǵary oqý oryndarynyń básekege qabilettiligin arttyrý jáne ońtaılandyrý jónindegi keńes maquldady. Sonymen qatar joǵary oqý oryndaryn jikteýdiń bul modeli «Qazaqstan Respýblıkasynyń Bilim berý salasyndaǵy keıbir zańnamalyq aktilerine ózgerister men tolyqtyrýlar engizý týraly» zań jobasynda qarastyrylǵan», dep jazdy Eraly Toǵjanov depýtattyq saýalǵa bergen jaýabynda.
JOO-lar kelesi toptar boıynsha bólinedi:
- Birinshi top - halyqaralyq jáne ulttyq deńgeıdegi JOO-lar;
- Ekinshi top - óńirlik deńgeıdegi JOO-lar;
- Úshinshi top - salalyq deńgeıdegi JOO-lar.
Qalǵan JOO-lar atalǵan toptardan tys bolady, ıaǵnı tórtinshi topqa jatady. Alǵash ret qurylatyn JOO tórtinshi topqa jatady.
Joǵary oqý oryndaryn toptar boıynsha jikteý bilim berý, ǵylymı qyzmet, ınternasıonaldandyrý nátıjelerine, sondaı-aq el, óńir jáne (nemese) sala ekonomıkasyna qosqan úlesine negizdeletin bolady.
Alǵashqy úsh topqa kiretin joǵary oqý oryndary úshin bilim berý baǵdarlamalaryn akkredıtteý, olardyń kásibı standarttarǵa sáıkestigi qajet. Ǵylymı qyzmettiń tabystylyǵy professorlyq-oqytýshylyq quramnyń dáıeksózdilik deńgeıine, ǵylymı kollaborasııaǵa, ǵylymı jobalardy kommersııalandyrýdan túsetin kiristerge, reıtıngtik jýrnaldardaǵy jarııalanymdar sanyna baılanysty aıqyndalatyn bolady.
