Ǵylymı-kópshilik basylymda arhıv qujattary men materıaldarynyń reprezentatıvti negizinde Qazaqstannyń qazirgi astanasynyń tarıhy júıeli túrde jazylǵan. Elordanyń qalyptasý tarıhynyń bastaý-bulaqtary men mańyzdy kezeńderi, joǵarǵy jáne ortalyq mekemelerdi kóshirý boıynsha memlekettik komıssııanyń jumysy, astanany kóshirýdiń strategııalyq baǵyttary, Tuńǵysh Prezıdentimizdiń róli, astanalyq qalanyń damý konsepsııasy men kúndelikti tarıhy, «Astana – jańa qala» arnaıy ekonomıkalyq aımaǵy jáne sonyń aıasynda qyzmet etken alǵashqy qalabasylarynyń jumystary kórsetiledi.
Kitap «Táýelsizdik», «Elbasy», «Elorda» jáne «Arhıv qujattaryndaǵy Astana» dep atalatyn tórt bólimnen turady, sońǵy jaǵynda túsiniktemeler, bıografııalyq anyqtamalar, qosymshalar jáne qujattar men materıaldardyń tizimi berilgen.
Qazirgi Qazaqstan tarıhyndaǵy tórtinshi astanamyz sanalatyn qalanyń ataýy, búginge deıin úsh ret ózgergeni, belgili. Táýelsizdiktiń alǵashqy jyldarynda-aq astanany kóshirý ıdeıasy paıda bolǵan. Bul 1992 jyl. Osy jyly qalaǵa Aqmola ataýy qaıtarylady. Astanany kóshirý prosesi bas-aıaǵy úsh-tórt jylǵa sozyldy. Kóp keshikpeı, ulttyq ekonomıkamyz turaqtanǵan 1998 jyly Aqmola qalasy Astana ataýyn alady. Araǵa biraz jyldar salyp, qazirgi Memleket basshysy Qasym-Jomart Toqaevtyń usynysymen Tuńǵysh Prezıdentimiz N.Á.Nazarbaevtyń qurmetine qala ataýy «Nur-Sultan» ataldy. Osy rette aıta keterligi, avtorlar 90-jyldardyń aıaǵyna qaraı, astananyń tusaýkeseri qarsańynda Aqmola óńirinen shyqqan bir top zııaly qaýym ókilderiniń Úkimet, Senat pen Májilistiń atyna Qazaqstan astanasyn «Nur-Sultan» dep ataý týraly málimdeme jasaǵanyn jáne onyń araǵan jıyrma jyldaı ýaqyt salyp iske asyrylǵanyn jazylǵan.
Kitaptyń sońǵy taraýynda elimizdiń astanasy týraly «Qalalyq ákimshilik qujattary», «Astanany kóshirý týraly materıaldar», «Arnaıy ekonomıkalyq aımaqtar jáne qalanyń damý jospary», «Astana-Nur-Sultan» dep atalatyn taraýlar boıynsha buryn-sońdy aınalymǵa ene qoımaǵan tyń arhıv qujattary berilgen.
Sonymen qatar qosymshalar arqyly «Astananyń qurmetti azamattary» men 1990 jyldan 2021 jylǵa deıingi Nur-Sultan qalasynda ornatylǵan eskertkishter tizimi jáne Nur-Sultan qalasynyń baýyrlas-qalalar men seriktesteri týraly qyzyqty málimetter kórsetilgen.
Qazaqstan Táýelsizdiginiń 30 jyldyǵy aıasynda shyqqan basylymnyń maqsaty da qazirgi jastardyń tarıhı sanasyn jetildirýge baǵyttalǵan.
