– Bul – bolashaq mamandar daıarlaýǵa úlken úles. «QazTransOıl» AQ óndiristik obektilerinde jastardy oqyta otyryp, biz munaı qubyrshylarynyń jańa býynyn ázirleımiz, – dep atap ótti «QazTransOıl» AQ bas dırektory Dımash Dosanov.
«QazTransOıl» AQ adam resýrstaryn basqarý departamentiniń menedjeri Ásel Tuqmanovanyń aıtýynsha, 2020 jyly elimizde engizilgen karantındik sharalarǵa baılanysty «QazTransOıl» AQ-na aqy tólenetin kásiptik praktıka toqtatylyp, 2021 jylǵy qazannan bastap qaıta bastaldy. Jyl sońyna deıin bizdiń kompanııada 150-den astam stýdent praktıkadan ótedi.
Irikteý kezinde stýdentterdiń úlgerimi men belsendiligi eskerildi. Osy jylǵy praktıkanttardyń arasynda kóshbasshylyq qasıetteri bar bolashaǵy zor jastar kóp.
– Men Taldyqorǵanda kóp balaly otbasynda týyp óstim. UBT-da 140-tan 125 ball jınap, «Munaı-gaz isi» mamandyǵy boıynsha JOO-ǵa tústim. Ýnıversıtette men oqý salammen baılanysty is-sharalarǵa jáne konkýrstarǵa belsendi qatysamyn, sondaı-aq volonterlik qyzmetpen aınalysamyn. Meni «QazTransOıl» AQ-qa aqy tólenetin taǵylymdamaǵa qabyldanǵanym týraly jańalyq tań qaldyrdy, óıtkeni bul stýdentter úshin úlken múmkindik. Operatorlyq qyzmetter departamentine kelip, Qazaqstannyń munaı qubyrlary júıesi, tehnologııalyq prosesterdi basqarýdyń avtomattandyrylǵan júıeleri jáne metrologııa týraly kóp aqparat aldym. Bul taǵylymdama maǵan teorııalyq bilimimdi is júzinde qoldanýǵa kómektesti. Alǵan bilimim jáne daǵdylarym úshin bizdiń mentorlarymyzǵa sheksiz rızamyn jáne bolashaqta maǵan elimizdiń jetekshi ulttyq kompanııasynda jumys isteý múmkindigi paıda bolady dep úmittenemin, dedi Qazaq-Brıtan tehnıkalyq ýnıversıtetiniń 4-kýrs stýdenti Erkejan Aıtmolda.
Stýdentterge munaı tasymaldaý salasynyń erekshelikterin zertteýge olarǵa bekitilgen kýratorlar kómektesti.
– Biz stýdentterdi munaı tasymaldaýdyń tehnologııalyq prosesimen tanystyrdyq, olarǵa bas dıspetcherlik basqarmanyń jumysy kórsetildi. Stýdentter jumys prosesine qatystyrylyp, oqýǵa qyzyǵýshylyqtaryn arttyrdy. Bolashaqta bul jastar bizdiń kompanııa jumyskerleriniń qataryn tolyqtyrady dep úmittenemiz, – dedi «QazTransOıl» AQ operatorlyq qyzmetter departamentiniń ınjeneri Dáýlet Kıbatov.
Praktıka barysynda kolledjde ózimiz oqyp tanysqan aspaptarmen jumys isteýdi úırendik. Buǵan bizge basshylar kómektesti, olar eńbek qaýipsizdigi jáne eńbekti qorǵaý boıynsha kirispe nusqama ótkizdi. Sonymen qatar bizdi arnaıy kıimmen, tegin tamaqpen jáne tasymaldaýmen qamtamasyz etti, – dedi Toraighyrov university 3-kýrs stýdenti Sovet Ádil.
Kóptegen stýdent úshin aqy tólenetin óndiristik tájirıbe bir aıǵa bolashaq mamandyq boıynsha «jumys isteýge» múmkindik berdi. Osy ýaqyt ishinde dıplom jumysynyń taqyrybyn tańdaǵandar da boldy.
– Men Qarashyǵanaq ken orny ornalasqan Batys Qazaqstan oblysynyń Aqsaı qalasynda dúnıege keldim. Bala kezimnen munaı-gaz sektoryndaǵy jumysty estip óstim. Bul mamandyq tańdaýǵa áser etti. «QazTransOıl» AQ-na praktıkadan ótý kezeńinde dıplomdyq jumysymnyń taqyrybyn tańdadym. Men úshin qazirgi óndiriste ózekti jáne suranysqa ıe bolatyn dıplomdyq jobany jazý óte mańyzdy. Sonymen qatar ýnıversıtette men stratosferadan kómirtekti alý boıynsha startap-jobalarmen aınalystym. Men ekologııany saqtap, qoǵam úshin paıdaly bolǵym keledi. Bul fakt praktıkadan ótýdi tańdaýǵa da áser etti, óıtkeni men «QazTransOıl» AQ óndiristik obektileri kómirtekti beıtaraptyqqa qol jetkizetin eldiń iri kásiporyndarynyń biri ekenin bilemin, – dedi Qazaq-Brıtan tehnıkalyq ýnıversıtetiniń 4-kýrs stýdenti Karına Qanat.
Aqy tólenetin praktıkadan ótý barysynda alynǵan praktıkalyq bilim men daǵdylardan basqa, stýdentter kompanııadaǵy eńbek qaýipsizdigi mádenıetiniń joǵary deńgeıin atap ótti.
– Bir aı boıy munaı tasymaldaý departamentinde jumys istedim. Bul departamentti «QazTransOıl» AQ-nyń «júregi» dep aıtsam qatelespeımin. Biz naqty jobalarmen jumys istedik, qubyr jelileriniń syzbalaryn jınadyq, munaı tasymalyn qadaǵaladyq, oqýdy trenajer-sımýlıatorlardyń kómegimen ótkizdik. «QazTransOıl» AQ-nyń árbir jumyskeri bizge árdaıym kómektesýge daıyn bolǵany qýantady. Sondaı-aq kompanııa aqparattyń qaýipsizdigin muqııat qadaǵalaıdy. Kompıýterdegi jumyskerlerdiń derekteri árdaıym qorǵalady. Jeke ózim elektrondy poshtaǵa keletin «spam» habarlamalardy ashýdyń qajeti joq ekenin bildim, sebebi ol qaýipti bolýy múmkin, dedi – Qazaq-Brıtan tehnıkalyq ýnıversıtetiniń 4-kýrs stýdenti Aıajan Beısenbaeva.
Jastardyń kompanııa jumyskerleri sııaqty qorshaǵan ortaǵa uqypty qaraýy – mańyzdy faktorlardyń biri.
– Mysaly, praktıkadan ótý kezinde biz «QazTransOıl» AQ-nyń barlyq jumyskeri sııaqty turmystyq qaldyqtardy suryptaýǵa qatystyq. Muny isteý óte ońaı boldy, óıtkeni ár qabatta qoqysty bólek jınaýǵa arnalǵan saýyttar bar. Sonymen qatar kompanııa jumyskerleri qaǵazdy únemdi jumsaıdy jáne ár qabatta ornalasqan ortaq prınterlerdi paıdalanady. Munyń barlyǵy «QazTransOıl» AQ ustanatyn «Jasyl» keńse erejelerine sáıkes keledi, – dedi Satbayev University 4-kýrs stýdenti Sultan Jumaǵul.
Taǵylymdamadan ótýshiler kompanııanyń qoǵamdyq ómirine belsendi qatysty. Jastar eńbek qaýipsizdigi jáne eńbekti qorǵaý salasyndaǵy «Altyn erejege» qanyq bolǵany sonshalyq, praktıkadan ótý aıaqtalǵannan keıin «QazTransOıl» AQ áleýmettik jelilerdegi resmı paraqshasynda jarııalaǵan rolıkter serııasyn daıyndady.
– Shyǵarmashyl jastardyń bizdiń kompanııamyzdaǵy jumysqa basqa qyrynan qaraǵany tamasha. Olarmen áńgime barysynda qoldanbaly bilimderden basqa, mobılografııa jáne SMM sııaqty qajetti daǵdylary bar ekenin bildik. Qarqyndy damyp kele jatqan kompanııa retinde biz jańa usynystarǵa ashyqpyz jáne bul praktıka stýdentterdiń «QazTransOıl» AQ-na ózderin kórsetýge úlken múmkindik berdi. Mysaly, praktıkanttar «Kompanııa jumyskerlerimen bir kún» aıdaryn usyndy, onda túrli kásip ókilderi óz qyzmetteri týraly áńgimelegen. Bizge bul ıdeıa unady, – dedi «QazTransOıl» AQ jurtshylyqpen baılanys jáne ishki kommýnıkasııalar departamentiniń dırektory Gúlnar Bısarınova.
Aqy tólenetin is-tájirıbeden ótken stýdentterdiń alǵan bilimderi olardy Qazaqstannyń magıstraldy munaı qubyry boıynsha ulttyq operatordyń jumyskerleri bolýǵa yntalandyrady jáne eldiń munaı tasymaldaý salasyn damytýǵa yqpal etýge múmkindik beredi.
Merýert ShÝKÝEVA
