Ortalyq kommýnıkasııalar qyzmetinde ótken brıfıngke Memlekettik qyzmet isteri agenttiginiń tóraǵasy Anar Jaıylǵanova, Prezıdent janyndaǵy memlekettik basqarý akademııasynyń rektory Erlan Ábil, «Memlekettik qyzmet personalyn basqarý ulttyq ortalyǵy» AQ bas dırektory Kenjebek Sanabaev qatysty.
Bıylǵy rezerv memlekettik qyzmetke arnalǵan 50 adamnan quralǵan. Negizgi talaptar azamattyǵy, jasy, bilimi jáne jumys ótili boldy. Konkýrsqa qatysýǵa 35 jastan aspaǵan, joǵary bilimi jáne keminde bes jyl eńbek ótili bar Qazaqstan Respýblıkasynyń azamattary jiberildi.
– Bolashaq rezervıstiń portretin jasaý kezinde transformasııalyq kóshbasshyǵa tán quzyretter jasaldy, ol óziniń jeke mansaptyq ambısııalaryna emes, eń aldymen, qoǵamdyq múddelerge negizdelgen. Tańdaý barysy talap etilgen bilimi, daǵdylary men qabiletterin anyqtap qana qoımaı, sondaı-aq kandıdattardyń shynaıy nıeti men qundylyqtaryn baǵalaýǵa baǵyttaldy, – dedi agenttik basshysy.
Tańdaýdan sátti ótken úmitkerler 3 jyl rezervte bolady. Irikteýge qatysýǵa nıet bildirgen azamattardan barlyǵy 8 638 ótinim qabyldanǵan. Ulttyq komıssııa otyrysynyń qorytyndysy boıynsha Prezıdenttik rezervke 50 kandıdatty qabyldaý týraly sheshim qabyldandy. Júrgizilgen taldaýǵa sáıkes, rezervshilerdiń 62 paıyzynyń (31 adam) sheteldik bilimi bar, 38 paıyzy (19 adam) qazaqstandyq joǵary oqý oryndarynda bilim alǵan. Olardyń 39-nyń magıstr dárejesi bar. О́ńirlik boıynsha rezervshilerdiń eń kóp sany Nur-Sultan qalasynan (35), Almaty men Pavlodar oblystarynan 3 úmitkerden tańdalǵan. Olardyń ortasha jasy – 30 jas, al eń jas rezervshi 25-te. Rezervke alynǵan adamdar Prezıdent janyndaǵy ýákiletti komıssııanyń sheshimi boıynsha «A» korpýsynyń saıası, ákimshilik laýazymdaryna, «B» korpýsynyń basshy laýazymdaryna jáne «B» korpýsynyń A sanaty tobynyń laýazymdaryna taǵaıyndalýy múmkin.
Prezıdent janyndaǵy memlekettik basqarý akademııasynyń rektory Erlan Ábil jobany iske asyrýdaǵy tórt baǵytty atap ótti.
– Qatysýshylardyń memlekettik tildi bilý deńgeıin anyqtaýǵa arnalǵan aqysyz onlaın test uıymdastyrdyq. Ekinshiden, 2021 jylǵy 12-17 qazan aralyǵynda akademııalyq orta ókilderi, memlekettik qyzmetshiler men bıznes qoǵamdastyqtar ókilderi qatarynan 103 sarapshynyń kómegimen «Sıtýasııalyq tapsyrmalardy sheshý» kezeńin ótkizdik. Baǵalaýdy bir ýaqytta úsh táýelsiz sarapshy júrgizdi. 514 úmitker sıtýasııalyq tapsyrmalardy sheshýge tyrysyp, onyń ishinde eń joǵary ball jınaǵan 235 adam kelesi kezeńge ótti, – dedi Erlan Ábil.
