EGER SOǴYS BOLMAǴANDA...

Abaı atyndaǵy memlekettik akademııalyq opera jáne balet teatrynda Uly Jeńistiń 65 jyldyǵyna arnalyp Darıǵa Nazarbaevanyń “Eger soǵys bolmaǵanda” atty qaıyrymdylyq konserti ótti. Qazaqstan Respýblıkasy tuńǵysh Prezıdenti qory, Almaty qalasynyń ákimdigi, “Degdar” qaıyrymdylyq qorynyń qoldaýymen iske asyrylǵan qaıyrymdylyq konsertin tamashalaǵan soǵys jáne tyl ardagerleri oq pen ot boraǵan maıdan dalasynda olardy Uly Jeńiske jigerlendirip, kúsh-qýat bergen asqaq rýhty ánderdi súısine tyńdady. Darıǵa Nazarbaevanyń oryndaýyndaǵy ataqty “Jýravlı”, “Sınıı platochek”, “Bylı dva drýga”, “Da­vaı zakýrım” jáne taǵy da basqa ánder óz tyńdaýshy­laryna erekshe bir qýanysh syılaǵandyǵyn atap aıtqan jón. Sonymen qatar, “Jelsiz túnde jaryq aı”, “Al­qońyr”, “Ilıgaı” sııaqty sulý sazdy ánder ánshiniń tabıǵı erekshe darynyn aıǵaqtaı túskendigi sózsiz. Shyndyǵynda da qudiretti de shynaıy óner júrekten shyqsa ǵana júrekke jetetindigin dáleldep jatýdyń qajeti de joq shyǵar. Lomonosov atyndaǵy Máskeý mem­lekettik ýnıversıtetinde oqyp júrgen sonaý stý­dent­tik kezderden beri Darıǵanyń ánge degen beıimdiligi aıqyn ańǵarylyp, ýaqyt óte kele oǵan degen qush­tarlyǵy da arta tústi. Uzaq izdenis pen qabilet óz nátıjesin berýde. Ásirese, ustazy Nadııa Sharıpovadan vokal boıynsha alǵan sabaqtarynyń orny múldem bólek. Parıj jáne Máskeýde de ánshi kórermenderdiń ystyq yqylasy men qurmetine bólendi. Sóz reti kelgende atap aıtarlyǵy, “Eger soǵys bolmaǵanda” qaıyrymdylyq konsertinde QR eńbek sińirgen qaıratkeri Tımýr Ormanshaev (fortepıano), Abaı atyndaǵy opera jáne balet teatrynyń ánshileri, halyqaralyq konkýrstardyń laýreattary Andreı Tregýbenko (barıton), Medet Shotbaev (tenor) ta qatysyp, óner kórsetti. Qasıetti Otan, týǵan jerdiń azattyǵy, jas urpaqtyń baqytty bolashaǵy jáne beıbit aspan úshin otqa túsken maıdangerlerge degen qurmet pen taǵzym jalǵasa bermek. Baqyt BALǴARINA. ALMATY.