Premer-Mınıstrdiń orynbasary Eraly Toǵjanovtyń tóraǵalyǵymen bıylǵy jyly Qazaqstan Respýblıkasynyń aýmaǵynda koronavırýstyq ınfeksııanyń paıda bolýy men taralýyna jol bermeý jónindegi VAK-tyń qorytyndy otyrysy ótti.
Otyrys barysynda eldegi epıdemıologııalyq ahýal turaqty, biraq «omıkron» bir aı ishinde álemniń 110 elinde anyqtalǵany aıtyldy. DDU málimetteri boıynsha onyń taralý jyldamdyǵy «delta» nusqasynan bes ese joǵary.
«Sondyqtan Densaýlyq saqtaý mınıstrliginiń qosymsha sharalar qabyldaý jónindegi usynysy maquldandy. Atap aıtqanda, 5 qańtardan bastap SOO-ǵa, saýda úıleri men karaokege «jasyl» mártebesi bar adamdarǵa ǵana kirýge ruqsat etiledi», dep jazady Covid-19 taratpaý jónindegi VAK.
VAK atap ótkendeı, Qazaqstan aýmaǵynda «omıkron» anyqtalyp, epıdjaǵdaıdyń nasharlaýy jaǵdaıynda bankterge, Qazposhta bólimshelerine, HQKO-larǵa, sporttyq-saýyqtyrý ortalyqtaryna, SPA-ǵa, basseınderge jáne t. b. qatysty osyndaı sharalar qabyldanatyn bolady.
Eraly Toǵjanov epıdemıologııalyq jaǵdaıdyń boljamy halyqty vaksınasııamen jáne revaksınasııamen qamtýǵa tikeleı baılanysty bolatynyn atap ótti.
