Oqýshylardyń komandalyq jumysy STEM (jaratylystaný ǵylymdary jáne ınjenerııa) blogynyń pánderin úırenýge baǵyttalǵan. Bul kez kelgen oqýshyǵa jaratylystaný pánderin tájirıbe júzinde qyzyqty ári kórnekti etýge múmkindik beredi.
– Kóptegen mektepte oqýshylar tek teorııalyq bilim alatyndyqtan, zerigip, sodan oqý úlgerimi tómendeýi baıqalady. Joba arqyly oqýshylar ǵylymı pánderdi optıkalyq materıaldar boıynsha oqýǵa múmkindik alady. Qazir ǵylymı patent alý ústindemiz. Kóp uzamaı qosymshany AppStore jáne PlayMarket-te iske qosatyn bolamyz, – deıdi komanda kapıtany Álibek Seıtov.
Balalardyń aıtýynsha, jumystyń kóp bóligi ıdeıany jetildirýge jumsaldy: toptyń bir bóligi vırtýaldy kórinister nemese bólmeler (paıdalanýshy eksperımentter júrgizetin jer) jasaýǵa kóńil bólse, keıbiri zertteý materıaldardy qarapaıym jáne túsinikti tilde jazyp, ózgeleri mobıldi qosymshanyń jumysyn tekserip, qatelikterin anyqtaǵan. Qosymsha – joǵary synyp oqýshylarynyń toptyq eńbeginiń jemisi.
– Biz oqýshylar naqty ǵylymdardyń qaǵıdattaryn jeńil ıgere alatyn dúnıe jasadyq. Mysaly, jasýshalardyń qurylymy, aýyrlyq prınsıpi sekildi taqyryptar. Barlyq kúsh-jigerimizdi ǵylymı salalardaǵy shyǵarmashylyq kózqaras tujyrymdamasyn jańǵyrtýǵa jáne júıeleýge baǵyttadyq, – dep túsindirdi 9-synyp oqýshysy, qosymshanyń tehnıkalyq bóligine jaýapty maman Insar Týngýshbaev.
Oqýshylar aldymen mobıldi qosymshany óz mektepterinde paıdalanýdy josparlap, ony 9 B synybynyń fızıka sabaǵynda synap kórdi.
– Qosymshanyń tıimdiligin atap ótkim keledi. Bir rolıktiń ishinde biz aýyrlyq zańy jáne massa uǵymdarymen tanystyq, – deıdi 9-synyp oqýshysy Sanjar.
Accessus jobasy Solve for Tomorrow respýblıkalyq baıqaýynyń qazylar alqasynyń da kóńilinen shyqty. Oqýshylar mobıldi qosymshany júzege asyrý maqsatynda 450 myń teńge kólemindegi syıaqy aldy. 2010 jyly AQSh-ta qurylǵan Solve for Tomorrow baǵdarlamasy qazir álemniń 23 elinde jumys isteıdi, – deıdi Nur-Sultan Halyqaralyq mektebiniń baspasóz hatshysy Quralaı Isaeva.
