Bashqurtstannyń hokkeıshileri pleı-offqa shyǵý máselesin kúni buryn sheship tastaǵan. Qazirgi kezde olar QHL-dyń turaqty birinshiliginiń jarys kestesinde úzdik segiz komandanyń qatarynda. Al «Barysqa» ár básekede baryn salý qajet. Sebebi olardyń Gagarın kýbogy jolyndaǵy jarysqa joldama alýy ne almaýy ázirge belgisiz. Sondyqtan da bul matchta da jerlesterimiz ádettegideı aıanbaı aıqasty. Biraq aǵymdaǵy jyldyń sońǵy kezdesýinde azýly «Salavat Iýlaevqa» bizdiń jigitterdiń áli jetpedi. Matchtyń 12-mınýtynda Sergeı Shmelev qonaqtardy alǵa shyǵarsa, 23-mınýtta Lınden Veı tarazy basyn teńestirdi. Arada tórt mınýttaı ǵana ýaqyt ótkende dál sol Shmelev ekinshi márte aıdyn ıeleriniń qaqpasyn dál kózdedi. 1:2 esebi básekeniń sońyna deıin saqtaldy.
Qazirgi kezde qorjynynda 42 upaı bar «Barys» jarys kestesinde 17-oryndy qanaǵat tutýda. Endi elordalyq klýb óziniń kelesi kezdesýin 3 qańtarda Nur-Sultanda Rıganyń «Dınamosyna» qarsy ótkizedi.
