Armysyń, aq Olımpıada!

Jańa sport túrleri qosyldy

Bıylǵy Beıjiń Olımpıa­dasynda sportshylar 7 sport túrindegi 15 baǵdarlama boıyn­sha 109 medal jıyntyǵyn sarapqa salady. Olımpıada baǵdarlamasyna engen sport túrleri – bıatlon, bobsleı (bobsleı, skeleton), kerlıng, konkı sportynyń túrleri (konkı jarysy, mánerlep syrǵanaý, short-trek), shańǵy sportynyń túrleri (taý-shańǵy jarysy, shańǵy qossaıysy, shańǵy jarysy, tuǵyrdan sekirý, frıstaıl, snoýbord), shana sporty, shaıbaly hokkeı. Sondaı-aq bıylǵy aq Olımpıadaǵa 7 jańa jarys túri qosyldy. Olar: áıelderdiń jekeleı bobsleıi, erler men áıelder arasyndaǵy shańǵy bıg-eıri, short-trektegi aralas estafeta, tuǵyrdan sekirý, frıstaıl jáne snoýbord-kross boıynsha aralas komandalyq jarystary. Boljam boıynsha, bıylǵy aq qar, kók muz ústindegi jarysqa 4 myńnan asa sportshy qatysady.

Tuńǵysh ret qysqy Olım­pııa oıyndary tarıhynda erler men áıelder sany bir­shama teńesti. Beıjińde áıel­der qatysatyn jarys aldyńǵy Olımpıadalarmen salys­tyr­ǵanda áldeqaıda kóp bolmaq. Iаǵnı qatysýshylardyń 45 pa­ıyzyn áıelder quraıdy. Ha­­lyq­aralyq Olımpıada ko­mıteti byltyr Tokıoda ótken jazǵy Olımpııa oıyndarynda da jol­damalardyń 51 paıyzyn erlerge, 49 paıyzyn áıelderge úlestirgen edi.

Qazaqstannyń Ulttyq Olım­pıada komıtetiniń deregi boıynsha, Qytaıdaǵy qysqy oıyndar «Taza muz ben qardaǵy qýa­­nyshty kún» uranymen óte­di. Uıym­das­tyrýshylar Beı­jiń-2022 dodasy mıllıon­daǵan qytaılyqtyń qysqy sport túrlerine qyzyǵýǵa shabyttandyrady dep úmittenedi.

Jarystar úsh qalada ótedi

Olımpııa oıyndary Beıjiń men onyń mańaıyndaǵy Iаnsın jáne Chjanszıakoý qalarynda uıymdastyrylady. 2008 jylǵy jazǵy Olımpıadaǵa arnap sa­lynǵan sport nysandarynda endi qysqy Olımpıadanyń kerlıng, hokkeı, konkımen júgirý sporty, sondaı-aq erler men áıelder arasyndaǵy snoýbordıng pen shańǵy frıstaılyndaǵy bıg-eır sekildi jarystar ótkiziledi.

Iаnsın – astananyń qala mańyndaǵy aýdany, Beıjińnen soltústik-batysqa qaraı 80 shaqy­rym jerde ornalasqan. Onda shań­ǵy, bobsleı, skeleton jáne shana sportynyń júldeleri sarapqa salynady.

Chjanszıakoý – Beıjińniń sol­tústik-batysyndaǵy kórshiles Hebeı provınsııasyna jaqyn ornalasqan qala. Munda snoýbordıng, shańǵy sportynyń barlyq túri jáne bıatlon jarystary ót­kiziledi.

Álemdegi «ondyqqa» enetin 10 sportshy

Qazaqstan Ulttyq Olımpıada komıteti (UOK) halyqaralyq qa­tynastar departamentiniń dırektory Álimjan Aqaevtyń aıtýynsha, qazaqstandyq sportshylar Beıjiń dodasynda sátti óner kórsetýge daıyn.

«Sportshylarymyzdyń kó­bi vaksına aldy jáne qazirgi da­ıyndyǵymyz joǵary deńgeıde. Qazir biraz sportshymyz oqý-jat­tyǵý jıynynda júr, birazy lısenzııa alý úshin jarystarǵa qatysýda. Lısenzııalyq týrnırler qańtardyń ortasyna deıin jalǵasady. Sodan keıin ǵana Olımpıadaǵa qatysatyn sportshylar sanyn naqty aıtamyz» deıdi departament dırektory.

UOK ókili atap ótkendeı, dál qazir Qazaqstan qorjynynda 60 lısenzııa bar. Qazaqstandyqtar lısenzııa alǵan sport túrleri qatarynda – shańǵy jarysy, tramplınnen shańǵymen sekirý, shańǵy qossaıysy, frıstaıl (mogýl, akrobatıka), taý shańǵysy, short-trek jáne konkımen júgirý básekesi bar. Sondaı-aq bıatlon sporty boıynsha da 4-5 ókilimiz Olım­pıadaǵa barýy múmkin. Jan­kúıerler short-trekshi jigitter­den de zor úmit kútedi. Kon­kı jarysyna shyǵatyn qyz-jigit­ter de  tájirıbeli sport­shylar. Olardyń naǵyz óz múmkin­dikterin kórsetetin sáti keldi. Ult­tyq Olımpıada komıteti lı­senzııa turǵysynan Phench­ha­ndaǵy jetistikti qaıta­laýǵa múmkindigimiz jetedi dep esepteıdi.

«Phenchhan Olımpıadasyna 91 lısenzııa jeńip alǵan 46 sportshy qatysty. Qazir «Beıjińge 48 sportshy barady, olar 95 lısenzııa utyp alady» dep josparlap otyrmyz. Búginde 60 lısenzııaǵa ıe bolǵanymyzben, ony áli de bekitý qajet. Iаǵnı sportshylar jarystarǵa qatysyp, lısenzııaǵa laıyq ekenin dáleldeýi tıis», deıdi UOK sport dıreksııasynyń dırektory Elsııar Qanaǵatov.

E.Qanaǵatovtyń aıtýynsha, 2022 jyldyń 16 qańtarynda Olımpıadaǵa qatysatyn sport­shylardyń aty-jóni tolyq belgili bolady. Bıyl qysqy sport túrleriniń daıyndyǵy úshin 2,9 mlrd teńge bólingen. Bul – aldyńǵy jyldarmen salys­tyrǵanda ájeptáýir kóp qarajat. UOK ókiliniń sózine sensek, dál qazirgi sátte álemdegi úzdik ondyq qataryna enetin 10 sportshymyz bar. Sonyń ishinde komıtet Iýlııa Galyshevany atap ótedi. Árıne, medal alýdan úmitti sportshylar tizimi Iýlııamen shektelmeıdi. Konkıshi, short-trekshi qyz-ji­gitterden de jankúıerler júl­de kútedi.

Jeti Olımpıadanyń jetistigi

Qysqy Olımpııa oıynda­rynyń tarıhyna kóz júgirter bolsaq, elimiz təýelsiz memle­ket retinde 1994 jyldan beri aq Olımpıadaǵa turaqty túrde qatysyp keledi. Qazaqstan ult­tyq quramasynyń músheleri bıyl qysqy Olımpıadaǵa se­gizinshi ret qatys­paq. Buǵan deıingi jeti Olımpııa oıyndarynda elimizdiń sportshylary segiz medal jeńip alǵan. Tar­qa­typ aıtar bolsaq, 1994 jyly Nor­vegııanyń Lıllehamer qala­synda ótken tórtjyldyqtyń bas­ty bəsekesinde shańǵyshy – Vla­dımır Smırnovtyń jalǵyz ózi bir altyn jəne eki kúmis medal ıelenip, aıdy aspanǵa bir-aq shyǵardy.

Japonııanyń Nagano qala­synda jalaýy jelbiregen kelesi tórtjyldyqtyń basty dodasynda otandastarymyz eki qola medaldy qanaǵat tutty. Birin Vladımır Smırnov oljalasa, ekinshi qola medaldy konkımen júgirý sportynyń ókili Lıýdmıla Prokasheva ıelendi. Munan keıingi eki Olımpıadada (2002 jyl, Solt-Leık-Sıtı (AQSh), 2006 jyl, Týrın (Ita­lııa) sportshylarymyz elge júl­desiz oraldy. Al 2010 jyly Vankýverde (Kanada) ótken kezekti Olımpıadada kúlli Qazaqstan Elena Hrýstalevanyń (bıatlon) kúmi­sin qanaǵat tutsa, 2014 jylǵy Sochı Olımpıadasynda Denıs Ten (mənerlep syrǵanaý) men 2018 jylǵy Phenchhanda Iýlııa Galyshevanyń (mogýl) jalǵyz qolasy Qazaqstan quramasyn júldesiz qaıtýdan qutqaryp qaldy.

Aldaǵy Beıjiń Olımpıa­dasynan da jerlesterimizden aıryqsha úmit kútemiz. 2008 jyly Qytaıda ótken jazǵy Olımpıada jer­lesterimiz úshin sátti bolyp, 2 altyn, 3 kúmis jáne 4 qola medal jeńip alǵan edi. Bul jol­ǵy Beıjiń Olımpıadasy da sport­shylarymyzǵa sátti bolyp, araǵa 28 jyl salyp el qorjynyna altyn júlde salady degen senimdemiz.