QR Parlament Májilisiniń depýtattary Edil Jańbyrshın men Samat Musabaev bastaǵan bir top azamattyń vıdeosy jarııalandy. Vıdeodaǵy málimet boıynsha, Mańǵystaý óńirinen shyqqan bir top azamat suıytylǵan munaı gazynyń baǵasyn retteý úshin qurylǵan Úkimet komıssııasymen birge jumys istep, eldiń talabyn jetkizýge atsalyspaqshy.
«Qadirli mańǵystaýlyqtar, suıytylǵan munaı gaz baǵasynyń Mańǵystaýda kúrt ósýine baılanysty halyq narazylyǵyn bildirýde. El óziniń ýájin bılikke jetkizip, talaptarynyń oryndalýyn suraýda. Bul - durys dep esepteımiz. Osy máselege baılanysty Mańǵystaýdyń birneshe azamaty qoǵamdyq shtab uıymdastyrdy. Shtab músheleri osy aýyldyń ózderińiz tanıtyn jigitterinen quralyp otyr. Áleýmettik jeliden jáne tikeleı telefondarymyzǵa Mańǵystaýdyń azamattary shyǵyp, osy iske aralasaýymyzdy suraýda. Eldiń birligi, halyqtyń tynyshtyǵy, Mańǵystaýdyń amandyǵy bárimizdiń ortaq abyroıymyz, aǵaıyn. Qoǵamdyq shtabtyń negizgi maqsaty – eldiń talabyn Úkimet komıssııasyna jetkizip, suıytylǵan munaı gaz máselesin sheshýge atsalysý. Biz osyǵan jumystanamyz», dedi Májilis depýtaty Edil Jańbyrshın atalmysh vıdeoda.
Qoǵamdyq shtabtaǵy azamattardyń naqty tizimi mynadaı:
Edil Jańbyrshın - QR Parlament májilisiniń depýtaty,
Samat Musabaev - QR Parlament májilisiniń depýtaty,
Abbat О́risbaev - Mańǵystaý oblystyq máslıhatynyń depýtaty,
Aıat Súgirbaı - Mańǵystaý oblystyq máslıhatynyń depýtaty,
Ýáıs Ersaıynuly - Aqtaý qalalyq máslıhatynyń depýtaty,
Ánýar Bımaǵambet - aqyn, jýrnalıst,
Altaı Almas - jýrnalıst.
