Sonymen qatar «Oblys ákimderi sport ınfraqurylymyn birtindep salýdy qamtamasyz etýge tıis», dep tapsyrma da bergen. Prezıdent tapsyrmasyna sáıkes, Jambyl óńirinde de sport salasyna tıisti kóńil bólinip keledi. Kezinde ataqty Jaqsylyq Úshkempirovten bastap, Olımpııa oıyndarynyń talaı jeńimpazdary shyqqan Áýlıeata jerinde sport salasy aıtarlyqtaı damyp keledi.
Búginde oblys boıynsha 4 524 sport seksııasy jumys atqarýda. 2020 jylmen salystyrǵanda seksııa sany 188-ge ósken. Sondaı-aq aımaq boıynsha 51 sport mekemesi bar.
«Atalǵan arnaıy sport mekemelerindegi sporttyq seksııalarda búginde 29 219 sportshy shuǵyldanýda. Bul sportshylardyń ishinde 20 450 azamat aýdan sportshylary bolyp sanalady. Atalǵan sportshylarmen 1 045 oqytýshy-jattyqtyrýshy jumys isteıdi», deıdi oblystyq dene shynyqtyrý jáne sport basqarmasynyń basshysy Nurbol Júnisbekov.
Jalpy, oblystyń sport mekemelerinde sporttyń 72 túri qamtylǵan. Onyń ishinde boks, dzıýdo, erkin kúres, grek-rım kúresi, karate, taekvondo, jeńil atletıka, fýtbol, júzý, velosport, basketbol, sý doby sııaqty barlyǵy 25 olımpıadalyq jáne sporttyq akrobatıka, armrestlıng, gir sporty, doıby, kıkboksıng, shahmat, belbeý kúresi sııaqty olımpıadalyq emes 19 oıyn túri bar. Sonymen qatar óńirde sportshylar qazaq kúresi, kókpar, aýdaryspaq, toǵyzqumalaq, asyq atý sııaqty barlyǵy 10 ulttyq oıynmen jáne 8 paralımpıadalyq, 7 sýrdlımpıadalyq, 3 paralımpıadalyq emes sport túrlerimen de shuǵyldanady.
Nurbol Júnisbekov buqaralyq sportty damytý jáne balalar men jasóspirimderdi dene shynyqtyrýǵa tartý maqsatynda byltyr 1 mamyrdan bastap memlekettik shyǵarmashylyq jáne sporttyq tapsyrystardy júzege asyrý boıynsha jumystar bastalǵanyn aıtty.
«Memlekettik sporttyq tapsyrysty iske asyrý maqsatynda byltyr jergilikti bıýdjetten 142 mln 328 myń teńge qarastyrylyp, sporttyń shahmat, fýtbol, taekvondo, karate, dzıýdo, erkin kúres, voleıbol, júzý, basketbol, fýtzal, grek-rım kúresi, boks, qazaq kúresi, aýyr atletıka, sporttyq bı, ústel tennısi, paýerlıftıng sııaqty 17 túrinen 10 998 bala sportqa tartyldy», deıdi ol.
Jalpy, Jambyl óńiriniń sport salasynda memleket qoldaýynyń nátıjesi de bar. Byltyr Tokıo qalasynda ótken HHHII jazǵy Olımpııa oıyndaryna oblystyń 5 sportshysy lısenzııa jeńip alǵany da úlken maqtanysh. Boksshy Ábilhan Amanqul, dzıýdoshy Eldos Smetov, erkin kúresten Álisher Erǵalı, sý dobynan Altaı Áltaev jáne taekvondodan Rýslan Japarov álemdik dodada baq synady. Nátıjesinde, Tokıo Olımpıadasynda Eldos Smetov qola medal ıegeri atandy. Al XVI jazǵy Paralımpıada oıyndaryna da ulttyq qurama komandasy sapynda 4 jambyldyq sportshy synǵa túsip, nátıjesinde parajúzýden Jumaǵalı Nurdaýlet qola medalǵa ıe boldy. Budan bólek, oblys sportshylary túrli respýblıkalyq jáne halyqaralyq baıraqty básekelerde 741 altyn, 562 kúmis, 611 qola medal alǵan. Bul jetistikterdiń barlyǵy da óńir sportynyń órkendeýine aıtarlyqtaı jol ashyp otyr.
Bilim salasyndaǵy básekeni arttyrý da zaman talaby. Ásirese, jastar úshin óner úırený, ǵylym ıgerý sııaqty qundylyqtar óte qajet. Bul rette de memleket tarapynan bilim berý salasyna tıisti kóńil bólinip, bilim sapasy artýda. Oblystyq bilim basqarmasynyń bas mamany Elmıra Pernebekqyzy búgingi tańda óńirde 76 qosymsha bilim berý mekemeleriniń bar ekenin, 4 584 úıirme jumys isteıtinin aıtty. Onyń ishinde 10 mekeme qala syrtyndaǵy lagerlerde bolsa, 58 mekeme – memleket menshiginde. Sondaı-aq 7 mekeme jekemenshik esebinde tur eken. Qazirgi kezde oblysta qosymsha bilim berý úıirmelerimen 67 796 bala qamtylǵan. Balalar dombyra tartý, sýret salý, teatrlandyrylǵan kórinisterdi qoıýdy úırený jáne taǵy da basqa óz qyzyǵýshylyqtary boıynsha úıirmelerge qatysa alady. Árbir úıirmege jetekshi bekitilgen. Úıirme qatysýshylary jyl saıyn túrli saladaǵy festıvalderge de qatysyp, júldeli bolyp keledi.
Árbir saladan nátıje kútiletini anyq. Memleket qoldaýymen oń nátıjege qol jetkizip kele jatqan óńir sporty men bilim salasy jastardy básekege qabilettilikke baýlýda tıisti jumystar atqaryp keledi. Al oń nátıjeniń oń ózgeristerge bastaıtyny belgili.
